අඛණ්ඩව පාඩු ලබන රාජ්ය ආයතනයක් වන ශ්රී ලංකා ගුවන් සේවය විසින් රජයෙන් තවත් රුපියල් බිලියන 100ක අතිරේක අරමුදල් ප්රමාණයක් ඉල්ලා තිබීම සම්බන්ධයෙන් විපක්ෂ පාර්ලිමේන්තු මන්ත්රී ආචාර්ය හර්ෂ ද සිල්වා මහතා දැඩි විවේචනයක් එල්ල කරයි. රූපවාහිනී නාලිකාවක් සමඟ අදහස් දක්වමින් මන්ත්රීවරයා කියා සිටියේ, ගුවන් සේවය අඛණ්ඩව පාඩු ලබමින් පවතින පසුබිමක මෙවැනි දැවැන්ත අරමුදල් ප්රමාණයක් ඉල්ලා සිටීම බරපතළ කාරණයක් බවයි.
ගුවන් සේවයේ පවතින පාලන තත්ත්වය පිළිබඳව ද මන්ත්රීවරයා සිය කනස්සල්ල පළ කළේය. ශ්රී ලංකා ගුවන් සේවය වසර එකහමාරක පමණ කාලයක සිට ප්රධාන විධායක නිලධාරියෙකු නොමැතිව ක්රියාත්මක වන බවත්, දැනට සභාපතිවරයෙකු ද නොමැති බවත් හෙතෙම පෙන්වා දුන්නේය. රජය විසින් පත් කරන ලද හිටපු සභාපතිවරයෙකු සම්බන්ධයෙන් ඇතිවී තිබූ දේශපාලන හා ව්යාපාරික ගැටුම් (Conflicts of Interest) පිළිබඳව මතු වූ ප්රශ්න ගැන ද සඳහන් කළ මන්ත්රීවරයා, ගුවන් සේවයට සිදු කෙරෙන ප්රධාන පත්වීම්වල විනිවිදභාවය පිළිබඳව ප්රශ්න මතු කළේය.
ශ්රී ලංකා ගුවන් සේවය කළමනාකරණය කරන්නේ කෙසේද යන්න සම්බන්ධයෙන් මහජනතාවට සත්ය දැනගැනීමේ අයිතියක් ඇති බව අවධාරණය කළ ආචාර්ය හර්ෂ ද සිල්වා මහතා, මූල්ය අර්බුදය, පාලන ව්යුහය සහ නායකත්වය සම්බන්ධ ගැටලු සඳහා වගවීමක් සහිතව පිළිතුරු ලබා දිය යුතු බව ද පවසා සිටියේය.
