ලෝක වෙළඳපොළේ රන් මිල අද (13) දිනයේදී සතියක පමණ කාලයකින් වාර්තා වූ අවම අගය දක්වා පහත වැටී තිබේ. ඇමරිකානු ඩොලරය ශක්තිමත් වීම සහ ඇමරිකානු මධ්යම බැංකුව (Federal Reserve) විසින් පොලී අනුපාත අඩු කරනු ඇතැයි පැවති බලාපොරොත්තු අඩුවීම මෙලෙස රන් මිල පහත වැටීමට ප්රධාන හේතුව වී ඇත. අද පෙරවරුවේ රන් අවුන්සයක මිල 0.6% කින් පහත වැටී ඩොලර් 4,718.98 ක් ලෙස සටහන් විය.
ඇමරිකා ඉරාන සාම සාකච්ඡා අසාර්ථක වීමත් සමඟ ලෝක වෙළඳපොළේ බොරතෙල් බැරලයක මිල ඩොලර් 100 සීමාව ඉක්මවා යාම නිසා උද්ධමනය ඉහළ යාමේ අවදානමක් මතුව තිබේ. මෙවැනි තත්ත්වයක් තුළ පොලී අනුපාත අඩු කිරීමට ඇති ඉඩකඩ සීමා වන බැවින් ආයෝජකයින් රන් වෙනුවට ඩොලරය කෙරෙහි වැඩි අවධානයක් යොමු කර ඇත. පෙබරවාරි 28 වනදා ආරම්භ වූ යුද වාතාවරණයත් සමඟ මේ දක්වා රන් මිල 11% කට වඩා වැඩි ප්රමාණයකින් පහත වැටී ඇති බව වෙළඳපොළ වාර්තා පෙන්වා දෙයි.
රන් මිලට අමතරව රිදී සහ ප්ලැටිනම් මිල ගණන් ද පහත වැටී ඇති අතර පැලේඩියම් මිලෙහි සුළු වර්ධනයක් දක්නට ලැබේ. මැද පෙරදිග පවතින අස්ථාවරත්වය සහ ඉන්ධන මිල ඉහළ යාම ඉදිරියේදී රන් මිල කෙරෙහි තීරණාත්මක ලෙස බලපානු ඇතැයි වෙළඳපොළ විශ්ලේෂක ටිම් වෝටරර් පවසයි.
