ඉරානයේ උත්තරීතර නායක අයතුල්ලා අලි කමේනිගේ අවමංගල්ය උත්සවය එළඹෙන ජූලි මස 4 වන දින ටෙහෙරාන් මහා මස්ජිදයේදී පැවැත්වීමට නියමිත බව විදෙස් වාර්තා පෙන්වා දෙයි. අමෙරිකානු එක්සත් ජනපදයේ 250 වන නිදහස් සංවත්සර දිනයටම සමගාමීව මෙම දිනය තෝරාගෙන ඇත්තේ අමෙරිකාවට සිය විරෝධය සංකේතාත්මකව පෙන්වීමේ අරමුණින් බවට අදහස් පළ වේ. මීට වසර 36ක් පුරා ඉරානය පාලනය කළ කමේනි මහතා ඉකුත් පෙබරවාරි 28 වන දින ඊශ්රායල ගුවන් ප්රහාරයකින් ජීවිතක්ෂයට පත්වූ අතර, ඔහුගේ අවමංගල්ය උත්සවය සඳහා සූදානම් වීමට මාස හතරකට අධික කාලයක් ගතවී තිබේ.
අවමංගල්ය පෙරහැර සහ උත්සවය ඉලක්ක කර ගනිමින් ඊශ්රායලය හෝ අමෙරිකාව ගුවන් ප්රහාර එල්ල කරනු ඇතැයි ඉරාන පාලනාධිකාරියේ ජ්යෙෂ්ඨ නිලධාරීන් දැඩි බියකින් පසුවන බව වාර්තා වේ. මෙම ප්රහාරයන් වළක්වා ගැනීම සඳහා විවිධ රටවල ජනාධිපතිවරුන්, අගමැතිවරුන් සහ ජ්යෙෂ්ඨ රාජ්ය තාන්ත්රිකයන්ට අවමංගල්යය සඳහා ආරාධනා කිරීමට ඉරානය පියවර ගෙන ඇත්තේ, ඔවුන් “මානව පලිහක්” ලෙස භාවිතා කරමින් ප්රහාරයක් එල්ල වීමේ සම්භාවිතාව අවම කර ගැනීමේ අරමුණින් බව දේශපාලන විචාරකයෝ පවසති. මෙම පසුබිම තුළ, ඉරාන බලධාරීන්ගේ සහ අභාවප්රාප්ත නායකයාගේ අවමංගල්ය පෙරහැරේ ආරක්ෂාව වෙනුවෙන් තම රාජ්ය නායකයන් හෝ දූත පිරිස් යැවීමට ඉදිරිපත් වන පළමු රට කුමක්ද යන්න පිළිබඳව ජාත්යන්තර අවධානය යොමු වී ඇත.
