කොවිඩ් වසංගතය තුළින් බිඳ වැටුණු ආර්ථිකය නැවතත් ගොඩනැගීම සඳහා ද දැඩි පරිශ්‍රමයක් දැරීමට සිදු වන බවත් ඒ සඳහා කඩිනම් විසඳුම ලබාදීමට 2022 සුදානම් බව වනජීවී හා වන සංරක්ෂණ අමාත්‍ය සී.බී.රත්නායක මහතා පවසයි.
අමාත්‍යවරයා මේ බව පැවසුවෙ ශ්‍රි ලංකා පොදුජන පෙරමුණ පක්ෂ මූලස්ථානයේ අද (11) පැවති ප්‍රවෘත්ති සාකච්ඡාවට එක්වමිනි.
එහිදි අමාත්‍ය සී.බී.රත්නායක මහතා මෙසේ අදහස් පල කලේය “අපි හෙට දවසේ අපේ රජයේ අයවැය ප්‍රකාශ කරන්න නියමිතයි. ඒ වගේම ඉතිහාසයට එක්වන රාජපක්ෂවරුන්ගේ අයවැය ප්‍රකාශ කිරීම හෙට දිනයේ පාර්ලිමේන්තුවේ ඉතිහාසයට එක්වන දිනයක් වෙනවා. ලෝක වසංගතය ඇවිල්ලා ලෝකයම සමාජය තුළත් ආර්ථික වශයෙනුත් විශාල පසුබෑමක් තිබෙන වෙලාවක රටේ ආර්ථිකය ගොඩනැගීමේ වගකීම භාර ගත්ත, දේශපාල වශයෙන් හිතන්නේ නැතිව තමන්ගේ රටේ ආර්ථිකය, ග්‍රාමීය මට්ටමෙන් ඉහළට ගෙන ඒමට වගකීම භාර ගත්ත මුදල් ඇමතිවරයා හැටියට කාර්ය භාර්යය බැසිල් රාජපක්ෂ මැතිතුමා හෙට දවසේ ඉෂ්ඨ කරනවා. මෙතුවක් කල් තිබ්බ අයවැය ඉදිරිපත් කරන කොට අපි බලාපොරොත්තු වුණ කාර්ය මේ ආකාරයෙන් සිදු වෙයිද කියලා කුතුහලයක් ඇතිවෙන්න පුළුවන්. ඒ නිසා නොහිතපු අවස්ථාවක කොරෝනා වසංගතයට විශාල මුදලක් වැය කරන්න සිදු වුණා. ඒ වගේම අපි අපේ රටේ ආර්ථිකය ගොඩනැගීම සඳහා අපේ කාර්ය භාර්ය ඉෂ්ට කරන්න සිදු වෙලා තිබෙනවා. මේ තත්වය උඩ තරඟ කරමින් අපිට ඉස්සරහට යන්න වෙලා තිබෙනවා.
නමුත් පහුගිය 2015 රට භාර ගත්ත යහපාලන ආණ්ඩුව ට්‍රිලියන 06 ක් විතර ණය අරගෙන වාරය චීනයට විකුණා දමමින් ගත්ත මුදලුත් එක්ක කරපු කාර්යයන් වනනේ කහ ඉර සුදු කරපු එකත්, රන් පැහැයේ තිබුණු පහේ කාසිය සුදු කරපු එකත් විතරයි කළේ. ඔවුන් හිතුවක්කාර ලෙස භාණ්ඩාගාරයෙන් මුදල් මංකොල්ල කාපු ආකාරය, ක්‍රියා කරපු ආකාරය, මහමොළකරුවන් හැටියට කටයුතු කරමින් රටේ ආර්ථිකය විනාශ කළා. හිස් කරපු භාණ්ඩාගාරයක් ලබාගන්න කොට අපිට ව්‍යසනයක් ආවා. ඒ ව්‍යසනයන් සමඟ තමයි අපිට රට ඉස්සරහට ගෙනියන්න පුළුවන්කමක් ලැබුණේ.
ජිවිතේ පරදුවට තියලා පේදුරුතුඩුවේ සිට දෙව්න්දර තුඩුව දක්වා ගුරුවරුන් කොළඹට ගෙනල්ලා දෙන්නෙක්ගේ චරිතයක් ඉහළට ගේන්න, මිනිස් ජිවිත උදුර ගන්න කටයුතු කරපු ආකාරය සහ පුහු ආටෝප සහ මිනිස් ජිවිතය ඇපයට තියලා ඔවුන්ගේ චරිත ගොඩනගා ගන්නා ආකාරය දැක්කා නේද? මේක තමයි ජනතා විමුක්ති පෙරමුණේ අභිමතය. මේක තමයි ස්ටාලින්ගේ අභිමතය. මේකට තවදුරටත් රැවටෙන්න එපා කියලා.
ආදරණිය වෘත්තිය සමිතින්ගෙන් සහ සහෝදර සහෝරියන්ගෙන් ඉල්ලන්නේ මේ කාරණය විසදන්න සැබෑ ලෙස මහපොළොවේ ජනතාව වෙනුවෙන් ආදරය දිනා ගත්ත කම්කරු නායකයෙක්ට විතරයි පුළුවන් වෙන්නේ. ඒ පස්වෙනි විධායක ජනාධිපති මහින්ද රාජපක්ෂ මැතිතුමා හැමදාම අරගලයක් තුළ, ප්‍රශන ගත අවස්ථාවක ඔවුන්ට විසඳුම් ලබා දිලා තිබෙනවා. ඒ නිසා මේ අර්බුදකාරි තත්වයක් තුළ අයවැයෙන් විශාල මුදලක් ලබාදීලා තිබෙනවා වගේම මේ ප්‍රශ්නය විසඳන්න කටයුතු කරලා තිබෙනවා.
මුදල් අමාත්‍යතුමා හෙට දවසේ ඉදිරිපත් කරන අයවැය ලේඛණයේ මම බලාපොරොත්තු වෙනවා ජනතාවාදි අයවැයක් හැටියට , ගම හදලා රට හැදීමේ කාර්යය සඳහා අත ගහනවා කියලා. සෑම ග්‍රාම සේවා වසමකටම ලක්ෂ 30 ගාණේද, පක්ෂ විපක්ෂ භේදයකින් තොරව ප්‍රාදේශීය නායකයන්ට ගම හැදීම සඳහා මිලියන 04 ක මුදලක් ලබා දෙන්න සූදානම් කරලා තිබෙනවා. ඒ තුළින් ගමේ සංවර්ධනය සඳහා දායකත්වය ලබා දීමට වැඩපිළවෙළක් සකස් කරලා තිබෙනවා.
ඊයේ ගුරු වැටුප් ප්‍රශ්නයට අයවැයින් විසඳුමක් ලබාදිලා තිබෙනවා. ඒ වගේම ගොවීන්ගේ ප්‍රශ්නයක් ද තිබෙනවා. ඒ සඳහා කෘෂි පොහොර වර්ග ලබාදීමට ද මේ අයවැයින් ඉදිරිපත් කරන සාධනීය කරුණු තුළින් විසඳුමක් ලබා ගන්න පුළුවන් වෙනවා කියලා මගේ විශ්වාසයයි.
ඒ වගේම උපාධිදාරීන්ට රැකියා අවස්ථා ලබාදීමට අනිවාර්යයෙන් මුදල් ඇමතිතුමා ඒ සඳහා අවකාශය ලබා දෙනවා. එසේම විරැකියාව සඳහා ද පිළීතුරු සොයන්න අවශ්‍ය කටයුතු සූදානම් කර තිබෙනවා. අපි අපේ ගමන ජනතාවාදී ආණ්ඩුවක් හැටියට ඉස්සරහට යන්න සූදානම් වෙලා තිබෙනවා. පහුගිය අවුරුදු 05 දි කරන්න බැරි දේවල් මේ අවුරුද්දෙන් කරන්න කියලා යහපාලන ආණ්ඩුවේ ආර්ථික ඔස්තාර්ලා කියනවා. ඔවුන් දැන් රට හදන්න කතා කරනවා.
ගරු ජනාධිපතිතුමා ඊලඟ පරපුර සඳහා අවස්ථාව සලසා දීමට අවශ්‍ය කටයුතු කරන්න සූදානම් වෙන්නේ. මේ රට ඉස්සරහට ගෙනියන්න අපි වැඩපිළිවෙළ ක්‍රියාත්මක කරන්නේ.
මේ කොවිඩ් 19 තුළින් බිඳ වැටුණු ආර්ථිකය පුනරුත්පානය කිරීම සඳහා කඩිනම් විසඳුම් ලබා දෙන වැඩපිළිවෙළක් 2022 වෙනකොට ක්‍රියාත්මක කරන්න සූදානම් වෙලා තිබෙනවා. ඒ සඳහා සියලු දෙනාගේ සහය අවශ්‍ය වෙනවා. එසේම භාණ්ඩවල මිල ඉහළ යාමේ ගැටලුවලට විසඳුම් ලබාදීම සඳහා ගරු මුදල් අමාත්‍ය බැසිල් රාජපක්ෂ මැතිතුමා විශේෂ වැඩිපිළවෙළක් ඉදිරිපත් කර තිබෙනවා. එතුමා මේ ජනතාවට සහනය සලසන අයවැයක් සූදානම් කරන්නේ. ”යැයි අමාත්‍යවරයා වැඩිදුරටත් කියා සිටියේය.
