ඉන්දීය ප්රිමියර් ලීග් (IPL) ඇතුළු ජාත්යන්තර ක්රිකට් තරගාවලි සඳහා සහභාගී වීමට අවශ්ය “විරෝධතා නොමැති බවට වන සහතිකය” (NOC) තමන්ට නිකුත් කරන ලෙස ශ්රී ලංකා ක්රිකට් ආයතනයට නියෝගයක් නිකුත් කරන්නැයි ඉල්ලා ක්රිකට් ක්රීඩක නුවන් තුෂාර මහතා ගොනු කළ පෙත්සම අප්රේල් 9 වැනිදා සලකා බැලීමට කොළඹ දිසා අධිකරණය අද (02) තීරණය කළේය.
ශ්රී ලංකා ක්රිකට් ආයතනය නියම කර ඇති ශාරීරික යෝග්යතා පරීක්ෂණය සමත් නොවීම හේතුවෙන්, තේරීම් කමිටුවේ නිර්දේශ මත මෙම සහතිකය නිකුත් කිරීම ප්රතික්ෂේප කර තිබුණි. කෙසේ වෙතත්, එම තීරණය නීති විරෝධී බව පවසමින් නුවන් තුෂාර මහතා නීතීඥ ජී.ජී. අරුල් ප්රගාසම් මහතා මාර්ගයෙන් මෙම පෙත්සම ඉදිරිපත් කර තිබේ.
මෙම පෙත්සමේ වගඋත්තරකරුවන් ලෙස ශ්රී ලංකා ක්රිකට් ආයතනය, එහි සභාපති ෂම්මි සිල්වා, ලේකම් බන්දුල දිසානායක, භාණ්ඩාගාරික සුජීව ගොඩලියැද්ද සහ ප්රධාන විධායක නිලධාරී ඈශ්ලි ද සිල්වා යන මහත්වරුන් නම් කර ඇත. ක්රීඩකයන්ගේ විදේශ තරගාවලි සහභාගීත්වය සහ දේශීය ශාරීරික යෝග්යතා මට්ටම් පිළිබඳ පවතින නීතිමය තත්ත්වය සම්බන්ධයෙන් මෙම නඩු විභාගය තීරණාත්මක වනු ඇතැයි අපේක්ෂා කෙරේ.
