පල්ලම, විල්පොත ප්රදේශයේ රණවිරුවකු සිහිකිරීම වෙනුවෙන් ඉදි කර තිබූ බස් නැවතුම්පොළක් එම ස්ථානයට නුදුරින් වෙළෙඳසලක් පවත්වාගෙන යන පුද්ගලයකු විසින් කිසිදු රාජ්ය ආයතනයක අවසරයකින් තොරව කඩා බිඳ දමා ඉවත් කිරීම සම්බන්ධයෙන් පල්ලම පොලිසිය පරීක්ෂණ ආරම්භ කර තිබේ.
වසර 24කට පෙර එල්.ටී.ටී.ඊ. සංවිධානයට එරෙහි සටනේදී කයිට්ස් ප්රදේශයේදී දිවි පිදූ නාවික හමුදා රණවිරු ආර්.එම්. ඉන්දික නිරෝෂන් බණ්ඩාර මහතා සිහිකිරීම වෙනුවෙන් මෙම බස් නැවතුම්පොළ ඔහුගේ මව්පියන්, සහෝදරයන් සහ පවුලේ ඥාතීන් විසින් ඉදි කර තිබිණි. එල්.ටී.ටී.ඊ. සංවිධානය රැගෙන ආ ආයුධ නැවක් විනාශ කිරීමේ මෙහෙයුමකදී එම නාවිකයා ඇතුළු සෙසු නාවිකයන් පිරිසක් මියගොස් ඇත.
කිසිදු රජයේ ආයතනයකින් හෝ අදාළ බස් නැවතුම ඉවත් කිරීමට දැනුම්දීමක් හෝ අවසරයක් ලබා දී නොමැති පසුබිමක, වෙළෙඳසල් හිමියා විසින් එය බලහත්කාරයෙන් කඩා බිඳ දැමීම හේතුවෙන් මියගිය රණවිරුවාගේ පවුලේ ඥාතීන් සහ ප්රදේශවාසීන් දැඩි කම්පාවට පත්ව සිටිති. ආරච්චිකට්ටුව ප්රාදේශීය සභාවෙන් තොරතුරු දැනගැනීමේ පනත යටතේ කළ විමසීමකදී ද එම ආයතනය තහවුරු කර ඇත්තේ මෙම බස් නැවතුම ඉවත් කිරීමට කිසිවෙකුටත් අවසර ලබා දී නොමැති බවයි.
රට දැය වෙනුවෙන් දිවි පිදූ රණවිරුවකුගේ සිහිවටනයකට සිදු කළ මෙම විනාශය බරපතළ අපරාධයක් බව පෙන්වා දෙන ඥාතීන්, අදාළ වෙළෙඳසල් හිමියාට එරෙහිව නීතිය ක්රියාත්මක කරන ලෙස බලධාරීන්ගෙන් ඉල්ලා සිටී. ඉකුත් 19 වැනිදා ප්රදේශවාසීන් සහ ඥාතීන් පිරිසක් මියගිය රණවිරුවාගේ සොහොන වෙත ගොස් පුෂ්පෝපහාර දක්වා ඔහු සිහිපත් කර තිබේ.
