පාස්කු ඉරුදින එල්ල වූ ත්රස්ත ප්රහාරයට මාස කිහිපයකට පෙර සිටම එවකට සිටි ජනාධිපතිවරයාගේ උපදෙස් මත තමන්ව ආරක්ෂක මණ්ඩල රැස්වීම් සඳහා කැඳවීම් නොකළ බව හිටපු පොලිස්පති පූජිත ජයසුන්දර මහතා අද (26) ත්රිපුද්ගල මහාධිකරණ විනිසුරු මඩුල්ල හමුවේ ප්රකාශ කළේය. එසේ වුවද, ඉන්දීය බුද්ධි අංශ මගින් එවැනි ප්රහාරයක සූදානමක් ඇති බවට ලැබුණු තොරතුරු අප්රේල් 09 වැනිදා තමන්ට දැනගන්නට ලැබුණු විගස, මහජන කැලඹීමක් ඇති නොවන අයුරින් අවශ්ය පියවර ගැනීම සඳහා ජ්යෙෂ්ඨ නියෝජ්ය පොලිස්පතිවරුන් සිව් දෙනෙකු දැනුවත් කිරීමට කටයුතු කළ බව ඔහු සිය විත්තිවාචකය ඉදිරිපත් කරමින් අවධාරණය කළේය.
තමන්ට එරෙහිව එල්ල වී ඇති චෝදනා සියල්ල ප්රතික්ෂේප කරමින් ඔහු සඳහන් කළේ, එවකට සිටි ජනාධිපති මෛත්රීපාල සිරිසේන මහතා තමන් සමඟ අමනාපව සිටීම මෙම සිදුවීමේ වගකීම තමන්ට සහ ආරක්ෂක ලේකම්වරයාට පමණක් පැවරීමට හේතු වූ බවයි. විශේෂයෙන්ම ත්රස්ත විමර්ශන කොට්ඨාසයේ සිටි නිලධාරියෙකු ස්ථාන මාරු කිරීමට ජනාධිපතිවරයා කළ යෝජනාවකට එකඟ නොවීම නිසා ඇති වූ විරසකය මත මාස පහක පමණ කාලයක් තමන්ව ආරක්ෂක මණ්ඩලයට කැඳවීමෙන් වැළකී සිටි බවත්, රාජ්ය බුද්ධි සේවය සෘජුවම ජනාධිපතිවරයා යටතේ ක්රියාත්මක වූ බවත් ඔහු වැඩිදුරටත් අධිකරණයට දන්වා සිටියේය.
ජාතික ආරක්ෂාව බිඳවැටීමේ වගකීමෙන් දේශපාලන අධිකාරියට සහ හමුදා බුද්ධි අංශවලට මිදිය නොහැකි බව පෙන්වා දුන් හිටපු පොලිස්පතිවරයා, තමන් පොලිස්පතිවරයා ලෙස කළ හැකි උපරිම පියවර ගත් බවත් තමන්ට කිසිදු මිනීමැරීමේ චේතනාවක් නොතිබූ බවත් සඳහන් කළේය. මෙම නඩුව ප්රියන්ත ලියනගේ (සභාපති), විරාජ් වීරසූරිය සහ තිලකරත්න බණ්ඩාර යන මහත්වරුන්ගෙන් සමන්විත ත්රිපුද්ගල මහාධිකරණ විනිසුරු මඩුල්ල හමුවේ විභාගයට ගැනෙන අතර, විත්තියේ සාක්ෂි ලබාදීම සඳහා විශ්රාමික ජ්යෙෂ්ඨ නියෝජ්ය පොලිස්පතිවරුන් තිදෙනෙකුට ලබන අප්රේල් 24 වැනිදා අධිකරණය හමුවේ පෙනී සිටින ලෙස දන්වා සිතාසි නිකුත් කෙරිණි.
වාර්තාකරණය – අධිකරණ වාර්තාකරු
