පසුගිය මාස 6ක කාලය තුළ QR ක්රමවේදය හරහා සහනාධාර තේ පොහොර බෙදා හැරීමේ වැඩපිළිවෙළ 2024/2025 සම්පූර්ණ වර්ෂයටම වඩා වැඩි ප්රගතියක් අත්කරගෙන ඇති බව වැවිලි සහ ප්රජා යටිතල පහසුකම් අමාත්යාංශය පවසයි. ශ්රී ලංකාවේ තේ නිෂ්පාදනය කිලෝ මිලියන 400 දක්වා ඉහළ නැංවීමේ ජාතික ඉලක්කය සපුරා ගැනීම සඳහා පසුගිය ඔක්තෝබර් 01 වනදා මෙම නව ක්රමවේදය හඳුන්වා දෙන ලදී.
නව ක්රමය යටතේ මාර්තු 31 වන විට කුඩා හා මධ්ය පරිමාණ තේ ගොවීන් 187,759 දෙනෙකු සඳහා සහනාධාර තේ පොහොර මෙට්රික් ටොන් 21,117.7ක් ලබා දී ඇත. මෙය 2024/2025 සම්පූර්ණ වර්ෂය තුළ සහනාධාර ලබාගත් ගොවීන් 84,472ක ප්රමාණයට සාපේක්ෂව 122.3%ක දැවැන්ත වර්ධනයකි. තේ වගා ඉඩම් ප්රමාණය වෙනුවට මාස තුනක සාමාන්ය දළු අස්වැන්න පදනම් කරගෙන සහනාධාරය නියම කිරීම සහ අනුමත පෞද්ගලික පොහොර සමාගම් හරහා ද බෙදාහැරීම සිදු කිරීම මෙම ප්රගතියට ප්රධාන හේතු වී තිබේ.
රජය විසින් කිලෝ ග්රෑම් 50 පොහොර මිටියක් සඳහා රුපියල් 4,000ක සහනාධාරයක් ලබා දෙන අතර, මැදපෙරදිග පවතින යුදමය වාතාවරණය හේතුවෙන් කුඩා තේ වතු හිමියන් මුහුණ දෙන අභියෝග සැලකිල්ලට ගෙන රුපියල් 5,000ක අමතර විශේෂ සහනාධාරයක් ද එක් වතාවක් පමණක් ලබා දීමට රජය තීරණය කර ඇත. භාණ්ඩාගාරය මගින් වෙන් කර ඇති මෙම මුදල ද QR ක්රමවේදය යටතේම වසර අවසානයට පෙර ගොවීන් වෙත ලබා දීමට අමාත්යාංශය සැලසුම් කර ඇත.
