බ්රිතාන්යයේ ලන්ඩන් නුවර පැවැත්වෙන පොදුරාජ්ය මණ්ඩලයීය ඉගෙනුම් කවුන්සිලයේ (COL) 43 වැනි පාලක මණ්ඩල රැස්වීමට සහභාගී වීම සඳහා නිල සංචාරයක නිරත වන ශ්රී ලංකා අග්රාමාත්ය ආචාර්ය හරිනි අමරසූරිය මහත්මිය සහ එක්සත් රාජධානියේ (UK) විදේශ ලේකම් ඉවෙට් කූපර් (Yvette Cooper) මහත්මිය අතර විශේෂ ද්විපාර්ශ්වික සාකච්ඡාවක් ඊයේ (20) ලන්ඩන් නුවරදී සාර්ථකව පවත්වා තිබේ.
මෙහිදී, මෑතකදී ශ්රී ලංකාවට දරුණු ලෙස බලපෑ “දිට්වා” සුළි කුණාටුවෙන් සිදු වූ විනාශය හමුවේ, රට නැවත ගොඩනැඟීමේ සහ ප්රතිසාධන කටයුතු වෙනුවෙන් බ්රිතාන්ය රජය ලබා දුන් ක්ෂණික හා අඛණ්ඩ මානුෂීය සහයෝගය වෙනුවෙන් අග්රාමාත්යවරිය ලංකා රජයේ විශේෂ ස්තූතිය පිරිනැමුවාය. එලෙසම, ශ්රී ලංකාව සහ එක්සත් රාජධානිය අතර පවතින ද්විපාර්ශ්වික වෙළෙඳ සහ අපනයන කටයුතු ඉහළ නැංවීමට බ්රිතාන්යය දක්වන දායකත්වය අගය කළ ඇය, වත්මන් ලංකා රජයේ මෑතකාලීන ආර්ථික වර්ධනය, ප්රතිපත්තිමය ප්රමුඛතා මෙන්ම මානව හිමිකම් සහ සංහිඳියාව ප්රවර්ධනය කිරීමට ගෙන ඇති සාධනීය පියවර පිළිබඳව බ්රිතාන්ය රාජ්යතාන්ත්රිකයන් දැනුවත් කළාය.
මීට අමතරව, වත්මන් ගෝලීය භූ-දේශපාලනික වර්ධනයන්, බලශක්ති අර්බුද මෙන්ම දෙරට අතර සංක්රමණ පද්ධතිවල සාධාරණත්වය සහ ව්යුහගත අධ්යයන සංචලතා රාමු (Student Mobility) ශක්තිමත් කිරීමේ වැදගත්කම පිළිබඳව ද දෙපාර්ශවය අතර දීර්ඝ ලෙස අදහස් හුවමාරු විය. මෙම වැදගත් රාජ්යතාන්ත්රික හමුව සඳහා බ්රිතාන්යයේ ශ්රී ලංකා මහකොමසාරිස් නිමල් සේනාධීර මහතා ඇතුළු උසස් නිලධාරීන් පිරිසක් ද අග්රාමාත්යවරිය සමඟ සහභාගී වී සිටියහ.
