ශ්රී ලංකාවේ ප්රවාහන ක්ෂේත්රයේ ප්රගතිය සහ මානව සම්පත් සංවර්ධනය වෙනුවෙන් රුසියානු සමූහාණ්ඩුව සමඟ විශේෂ අවබෝධතා ගිවිසුමකට එළඹීම සඳහා අමාත්ය මණ්ඩලයේ අනුමැතිය හිමිව තිබේ. ප්රවාහන ක්ෂේත්රයේ නිරත පිරිස් පුහුණු කිරීම අරමුණු කරගනිමින් රුසියානු සමූහාණ්ඩුවේ ප්රවාහන අමාත්යාංශය සහ ශ්රී ලංකා රජය අතර මෙම ගිවිසුමට එළඹීම සඳහා මීට පෙර (2024-02-12 දින) පැවති අමාත්ය මණ්ඩල රැස්වීමේදී ද මූලික අනුමැතිය ලබා දී තිබුණි.
කෙසේ වෙතත්, විවිධ හේතූන් මත එම ගිවිසුමට මෙතෙක් නිල වශයෙන් අත්සන් තබා නොමැති අතර වත්මන් රජය විසින් එහි පවතින වැදගත්කම යළිත් හඳුනාගෙන ඇත. විශේෂයෙන්ම ශ්රී ලංකාවේ ප්රවාහන ක්ෂේත්රය තුළ දැනටමත් හඳුන්වා දී ඇති බහුවිධ ප්රවාහන ක්රමවේද (Multimodal Transport), ප්රවාහන ක්ෂේත්රය තුළ රාජ්ය-පෞද්ගලික හවුල්කාරිත්වය (PPP), ප්රාදේශීය සහ නාගරික ප්රවාහන පද්ධති සංවර්ධනය කිරීම, ප්රවාහන යටිතල පහසුකම් කළමනාකරණය සහ ප්රවාහන සුරක්ෂිතතාව වැනි නවීන කළමනාකරණ ක්රමවේදයන් සඳහා අවශ්ය ජාත්යන්තර දැනුම සහ පුහුණුව ලබා ගැනීමට මෙමඟින් විශාල පිටුවහලක් ලැබෙන බව රජය පෙන්වා දෙයි.
ඒ අනුව, කාලීන අවශ්යතාවක් සේ සලකා අදාළ අවබෝධතා ගිවිසුමට කඩිනමින් අත්සන් තැබීම පිණිස ප්රවාහන, මහාමාර්ග සහ නාගරික සංවර්ධන අමාත්යවරයා ඉදිරිපත් කළ යෝජනාවට අමාත්ය මණ්ඩලය විසින් සිය පූර්ණ අනුමැතිය ලබා දී ඇත.
