රට බෙදුම්වාදයේ සැණකෙළි බිමක් වෙලා
වර්තමාන ආණ්ඩුව හරි දැක්මක් හෝ විදිමත් රාජ්ය පාලනයක් නොමැති කමින් රට බෙදුම්වාදයේ සැනකෙලි බිමක් වී ඇතැයි එක්සත් ජාතික නිදහස් පෙරමුණ පවසයි.
එම පක්ෂයේ ප්රධාන ලේකම් මෛත්රී ගුණරත්න මහතා අද (04) පෙරවරුවේ මාධ්ය හමුවක් කැඳවමින් කියා සිටියේ අද රට පුරාම මහ අරාජිකත්වයක් ඇති වෙලා තිබෙන බව.
දකුණේ පාතාලය හන්දි ගානේ මිනිස්සු ඝාතන කරන අතර රටේ ව්යාපාරිකයෝ ජිවත් වෙන්නේ බියෙන් හා සැකෙන් බව ද හෙතෙම කියා සිටියේය.
එහිදී ඒ මහතා මෙසේ වැඩිදුරටත් අදහස් පල කර සිටියේය “අද උතුරු පළාත සම්පුර්ණයෙන්ම බෙදුම්වාදී අදහස් වලින් ත්රස්තවාදී මතවාදවලින් පෝෂණය වෙමින් පවතිනවා.ආණ්ඩු සැබෑ සංහිඳියාවක් වෙනුවට නිවට නොහැකියාවක් පෙන්වමින් ඉන්නවා.ඒ වගේම අපි ආණ්ඩුවට කියනවා ඉදිරි මැතිවරණය දිහා බලාගෙන රට බිල්ලට දෙන්න සුදානම් වෙන්න එපා කියලා.අපි පහුගිය කාලයේදී යාපනයට ගියා,යාපනයේ ජනතාව හමුවුනා ඒ අය සමග අපි කතා කරා.ඒ ජනතාවට බොන්න වතුර නැහැ,විදුලිය නැහැ,නිවස නැහැ.ඒ ප්රදේශවල ඉන්න තරුණ තරුණියන්ට රස්සාවල් නැහැ.අද දෙමල ජාතික සන්ධානය මේ ප්රශ්න ගැන කතා කරන්නේ නැහැ.ඔවුන් කතා කරන්නේ වෙනම ඊලාම් රාජ්යක් ගැන.යාපනය ඇතුළු උතුරේ ජනතාවට මේ නිජබිම් සංකල්ප තේරෙන්නේ නැහැ.ඔවුන් ඉල්ලන්නේ රටේ සාමාන්ය ජනයා ඉල්ලා සිටින දේවල් තමයි.නමුත් TNA ඒක මේ ප්රශ්න කතා කරන්නේ නැහැ.සම්බන්ධන් විපක්ෂ නායකයා වෙලා දැන් අවුරුදු තුනක් ඉන්නවා,අපි අහනවා උතුරේ විසඳපු ප්රශ්නය මොකක්ද කියලා.සම්බන්දන් ඇතුළු දෙමල ජාතික සන්ධානය උතුරේ අහිංසක දෙමල ජනතාව පෙන්වමින් කොළඹ සැප විඳිනවා,එච්චරයි.ඔවුන් වෙනම රටක් පෙන්වමින් දෙමල ජනතාව විශාල විනාශයක් කරා රැගෙන යමිනුයි මේ ඉන්නේ.අද ආණ්ඩුවත් TNA එකට වන්දනා මාන කරමින් ඉන්නවා මිසක් සැබෑ ලෙස උතුරේ දෙමල ජනතාවගේ ප්රශ්න දිහා බලන්නේ නැහැ.ඒ නිසා උතුරේ දේශපාලඥයන් ඔවුන් දෙමල නිජබිම එහෙමත් නැත්නම් ඊලාම් රාජ්යක් කියන තැනට තල්ලු කරමින් ඉන්නවා.විජයකලාගේ ප්රකාශයෙන් ඒ අවස්ථාවාදී දේශපාලනය අපිට පෙන්න තියෙනවා විජයකලාට දමිල ජනතාවගේ නාමයෙන් රට ඊලාම් කොටි ආයේ ඕනේ කියලා ප්රසිද්ධියේ කියන්න පුළුවන් වෙලා තියෙන්නේ ඒ නිසා බව අපි පැහැදිලිව ප්රකාශ කරන්න කැමතියි.විජයකලා රාජ්ය ඇමතිවරිය මේ ප්රකාශ කරන්නේ රටේ විදේශ ඇමතිවරයා වගේම මේ රටේ ස්වදේශ කටයුතු ඇමතිවරයාත් ළඟ තබාගෙනයි.අපිට පේනවා මේ ආණ්ඩුව ඒ තරමට පිරිහීමට පත්වෙලා කියලා.මේ රටට ඉදිරියට යාමට පුළුවන් වෙන්නේ ශක්තිමත් නායකත්වයක් එක්ක නොබෙදුණු රටක් විදියට විතරයි.නමුත් අද වෙනකොට මේ ආණ්ඩුවට ඒක කරන්න බෑ කියලා ඕනෑවටත් වඩා ඔප්පු කර අවසන් බව “ යැයි මෛත්රි ගුණරත්න මහතා වැඩි දුරටත් කියා සිටියේය.