ඇමෙරිකානු ජනාධිපතිවරයාගේ දැඩි සංක්රමණික ප්රතිපත්ති ක්රියාත්මක වීමත් සමඟ, වලංගු ග්රීන් කාඩ් පත් නොමැතිව එරට රැඳී සිටි ශ්රී ලාංකිකයන් 06 දෙනෙකු විශේෂ ගුවන් යානයකින් මෙරටට පිටුවහල් කර තිබේ.
මෙලෙස පිටුවහල් කරන ලද පිරිස යාපනය, පමුණුගම, පේදුරුතුඩුව සහ ඩෙල්ෆ් යන ප්රදේශවල පදිංචිකරුවෝ වෙති. ඔවුන් 28 වන දින අලුයම 12:00 ට OAE-4013 දරන විශේෂ ඇමෙරිකානු ගුවන් යානයකින් කටුනායක ගුවන් තොටුපොළ වෙත රැගෙන එන ලදී.
මෙම ගුවන් යානය තුළ ශ්රී ලාංකිකයන් 06 දෙනාට අමතරව තවත් විවිධ රටවලින් පිටුවහල් කරන ලද පුද්ගලයන් 162 දෙනෙකු සිටි බව වාර්තා වේ. ශ්රී ලාංකිකයන් පිරිස කටුනායකදී භාර දීමෙන් පසුව එම යානය නේපාලයේ කත්මණ්ඩු නුවර බලා පිටත්ව ගොස් තිබේ.
ආරක්ෂක අංශ සිදු කළ මූලික විමර්ශනවලදී අනාවරණය වී ඇත්තේ, මෙසේ පිටුවහල් කළ එක් ශ්රී ලාංකිකයෙකුගේ බිරිඳ සහ මෑතකදී උපත ලැබූ කුඩා දරුවා තවදුරටත් ඇමෙරිකාවේ රැඳී සිටින බවයි.
කටුනායක ගුවන් තොටුපොළ අපරාධ පරීක්ෂණ දෙපාර්තමේන්තුව (CID) මඟින් සිදු කළ පරීක්ෂණවලදී මොවුන් මෙරට තුළ කිසිදු අපරාධයකට සම්බන්ධ වී නොමැති බව තහවුරු විය. ඒ අනුව 28 වන දින දහවල් කාලයේදී ඔවුන් නිදහස් කර යවා ඇත.
