ඇමරිකාව සහ ඉරානය අතර සති අන්තයේදී පාකිස්ථානයේ ඉස්ලාමාබාද් නුවර පැවැත්වීමට නියමිත තීරණාත්මක සාම සාකච්ඡා හමුවේ ලෝක වෙළඳපොළේ තෙල් මිල තවදුරටත් ඉහළ මට්ටමක පවතී. අද (10) පෙරවරුවේ බ්රෙන්ට් (Brent) බොරතෙල් බැරලයක මිල ඇමරිකානු ඩොලර් 96.75 ක් ලෙස සටහන් වූයේ හෝමුස් සමුද්ර සන්ධිය තවදුරටත් වසා දමා තිබීම හේතුවෙනි.
සටන් විරාම ගිවිසුමෙන් පසු තෙල් මිල සුළු වශයෙන් පහත වැටුණද, ඉරානය හෝමුස් සමුද්ර සන්ධියේ පාලනය නව අදියරකට රැගෙන යන බව ප්රකාශ කිරීමත් සමඟ මිල නැවතත් ඉහළ යාමට පටන් ගෙන තිබේ. ඉරානය විසින් තෙල් නැව්වලින් ගාස්තු අය කරන බවට ලැබෙන වාර්තා සම්බන්ධයෙන් ඇමරිකානු ජනාධිපති ඩොනල්ඩ් ට්රම්ප් දැඩි අනතුරු ඇඟවීමක් කරමින් පවසා ඇත්තේ එම කටයුතු වහාම නතර කළ යුතු බවයි.
මෙම සාකච්ඡාවල ප්රතිඵලය මත ලෝක බලශක්ති සැපයුමේ අනාගතය තීරණය වනු ඇති අතර, හෝමුස් සමුද්ර සන්ධිය විවෘත කිරීම කෙරෙහි ආයෝජකයින් දැඩි අවධානයක් යොමු කර සිටී. ඉන්ධන මිල ඉහළ යාම නිසා ගෝලීය උද්ධමන පීඩනය තවදුරටත් උග්ර වීමේ අවදානමක් පවතින බව මූල්ය විශ්ලේෂකයෝ අනතුරු අඟවති.
