ඇමෙරිකානු රූපවාහිනී නාලිකාවක් (NBC) සමඟ පැවැති සිය ප්රථම සම්මුඛ සාකච්ඡාවට එක්වෙමින් කියුබානු ජනාධිපති මිගෙල් ඩියාස්-කැනෙල් (Miguel Diaz-Canel) ප්රකාශ කර සිටියේ ඇමෙරිකානු රජය එල්ල කරන කුමන බලපෑමක් හමුවේ වුවද තමා ධුරයෙන් ඉල්ලා අස් නොවන බවයි. “විප්ලවවාදීන් අතහැර දමා පලා යාම අපේ ශබ්දකෝෂයේ නැති වචනයක්” යැයි 65 හැවිරිදි ජනාධිපතිවරයා මෙහිදී අවධාරණය කළේය.
මෙම ප්රකාශයත් සමඟම රුසියාව ද සිය පැරණි මිතුරා වෙනුවෙන් ඉදිරිපත් වී තිබේ. රුසියානු නියෝජ්ය විදේශ අමාත්ය සර්ජි රියාබ්කොව් (Sergei Ryabkov) ප්රකාශ කළේ රුසියාව කිසිවිටෙකත් කියුබාව පාවා නොදෙන බවත්, ඇමෙරිකාව කුමන බාධක පැමිණවූවත් කියුබාවට අවශ්ය ඉන්ධන සහ අනෙකුත් සහයෝගය දිගටම ලබා දෙන බවත්ය. පසුගිය මාර්තු මාසයේදී රුසියානු ‘Anatoly Kolodkin’ නෞකාව හරහා බොරතෙල් බැරල් 730,000ක් කියුබාවට ලබා දීමෙන් පසුව මෙම සහතිකය ලැබී තිබේ.
වත්මන් ඇමෙරිකානු ජනාධිපති ඩොනල්ඩ් ට්රම්ප් විසින් කියුබාවට එරෙහිව දැඩි සම්බාධක පනවා ඇති අතර, වැනිසියුලාවෙන් ලැබුණු තෙල් සැපයුම නතර වීමත් සමඟ කියුබාව මේ වන විට දැඩි බලශක්ති අර්බුදයකට මුහුණ දී සිටී. කෙසේ වෙතත්, බටහිර අර්ධගෝලයේ සිය අවශ්යතා අතහැර දැමීමට රුසියාව සූදානම් නැති බව රියාබ්කොව් වැඩිදුරටත් ප්රකාශ කර ඇත.
