චීනය සතු අධිවේගී හයිපර්සොනික් (Hypersonic) මිසයිල මගින් පැසිෆික් කලාපයේ ඇති ඇමෙරිකානු යුද නැව්වලට එල්ල විය හැකි තර්ජන මැඩපැවැත්වීම සඳහා, ඇමෙරිකානු නාවික හමුදාව සිය යුද නැව්වලට පේට්රියට් මිසයිල සවි කිරීමට පියවර ගෙන තිබේ. ලොක්හීඩ් මාටින් (Lockheed Martin) සමාගම විසින් නිෂ්පාදනය කරන මෙම මිසයිල පද්ධතිය මෙතෙක් භාවිතා කළේ ගොඩබිම ස්ථාපිත හමුදා කඳවුරු ආරක්ෂා කිරීමට පමණි.
ලොක්හීඩ් මාටින් සමාගම විසින් නාවික හමුදාවේ ‘ඊජිස්’ (Aegis) සටන් පද්ධතිය සමඟ පේට්රියට් මිසයිල (PAC-3 MSE) ඒකාබද්ධ කිරීමේ කොන්ත්රාත්තුව ජයග්රහණය කර ඇත. මෙය මෙම ආයුධය මුහුදේදී භාවිතා කරන ප්රථම අවස්ථාව ලෙස වාර්තා වේ.
පේට්රියට් මිසයිල සතු ‘Hit to kill’ තාක්ෂණය, එනම් ඉලක්කය අසල පුපුරා යාම වෙනුවට ඉලක්කයේ සෘජුවම ගැටී එය විනාශ කිරීමේ හැකියාව, ඉතා වේගයෙන් ගමන් කරන චීන හයිපර්සොනික් මිසයිල විනාශ කිරීමට වඩාත් සුදුසු බව විද්යාඥයෝ පෙන්වා දෙති. මෙමගින් ඇමෙරිකානු ඩිස්ට්රෝයර් (Destroyer) වර්ගයේ යුද නැව්වලට අතිරේක ආරක්ෂක ස්ථරයක් හිමි වනු ඇත.
පවතින ගෝලීය යුදමය තත්ත්වය සැලකිල්ලට ගනිමින් පේට්රියට් මිසයිල සඳහා ඇති ඉල්ලුම බෙහෙවින් ඉහළ ගොස් තිබේ. ඒ අනුව, ඉදිරි වසර හත තුළ මෙම මිසයිල නිෂ්පාදනය වසරකට 600 සිට 2,000 දක්වා තුන් ගුණයකින් වැඩි කිරීමට ලොක්හීඩ් මාටින් සමාගම සහ පෙන්ටගනය තීරණය කර ඇත.
මෙම පියවර මගින් පැසිෆික් කලාපයේ ඇමෙරිකානු නාවික බලය ශක්තිමත් වන අතර, චීනයේ මිසයිල තාක්ෂණයට එරෙහිව ප්රබල ආරක්ෂක පවුරක් ගොඩනැංවීමට ඇමෙරිකාව සමත් වනු ඇති බව යුද විශ්ලේෂකයෝ පවසති.
