බලහත්කාර ශ්රමය යොදාගනිමින් නිෂ්පාදනය කරනු ලබන භාණ්ඩ ආනයනය කිරීම පාලනය කිරීම සහ ඊට එරෙහිව දැඩි නීතිමය රාමුවක් ක්රියාත්මක කිරීම අරමුණු කරගනිමින්, ඇමරිකානු වෙළඳ නියෝජිත කාර්යාලය විසින් රටවල් 60ක් ඉලක්ක කර ගනිමින් නව තීරුබදු යෝජනාවක් ඉදිරිපත් කර තිබේ. ගෝලීය වෙළඳාම තුළ මානව හිමිකම් සහ ශ්රම සුරක්ෂිතතාව තහවුරු කිරීමේ අරමුණින් මෙම පියවර ගෙන ඇතත්, එය ජාත්යන්තර වෙළඳ තරගකාරිත්වයට සහ ඇතැම් රටවල ආර්ථික ස්ථාවරත්වයට සෘජු බලපෑමක් එල්ල කරනු ඇතැයි විචාරකයෝ පෙන්වා දෙති. මෙම තීරණය ශ්රී ලංකාවටද සෘජුවම බලපෑම් එල්ල කර ඇති අතර, එය අප රටේ අපනයන ක්ෂේත්රයේ අනාගතය පිළිබඳ බරපතල ප්රශ්න මතු කරමින් පවතී.
මෙම යෝජිත බදු ව්යුහය තුළ බදු අනුපාත කාණ්ඩ දෙකක් යටතේ රටවල් වර්ගීකරණය කර ඇති අතර, ශ්රී ලංකාව ඇතුළු රටවල් 46ක් සඳහා 12.5%ක ඉහළ තීරුබදු අනුපාතයක් යෝජනා කර තිබීම විශේෂත්වයකි. මෙම කාණ්ඩයට චීනය, ඉන්දියාව, ජපානය සහ දකුණු කොරියාව වැනි ප්රබල ආර්ථිකයන් ද ඇතුළත් වේ. මීට සාපේක්ෂව කැනඩාව, යුරෝපා සංගමය, බංග්ලාදේශය, කාම්බෝජය සහ මැලේසියාව වැනි රටවල් සඳහා 10%ක අඩු බදු ප්රතිශතයක් යෝජනා කර තිබේ. ඇමරිකානු ඇඟලුම් වෙළඳපොළ තුළ ශ්රී ලංකාවේ ප්රබලම තරගකරුවන් වන බංග්ලාදේශය සහ කාම්බෝජය වැනි රටවල් අපට වඩා අඩු බදු කාණ්ඩයකට අයත් වීම, දේශීය අපනයනකරුවන්ට දරාගත නොහැකි තරගකාරී පීඩනයක් එල්ල කරනු ඇති බවට ආර්ථික විශ්ලේෂකයෝ අනතුරු අඟවති.
එළඹෙන කාලසීමාව තුළ මෙම යෝජනා ක්රියාත්මක වීමත් සමඟ ශ්රී ලංකාවේ ඇඟලුම් අපනයන අංශය වෙත විශාල අභියෝගයක් එල්ල වනු නොඅනුමානය. ජාත්යන්තර වෙළඳ නීති සහ ශ්රම ප්රමිතීන් කෙරෙහි රටේ පවතින අනුකූලතාවය පිළිබඳ ගැඹුරු සමාලෝචනයක් අවශ්ය බව මෙයින් පැහැදිලි වන අතර, ඇමරිකානු වෙළඳපොළ තුළ අපගේ පංගුව ආරක්ෂා කර ගැනීමට නම් වඩාත් උපායමාර්ගික සහ රාජ්ය තාන්ත්රික ප්රවේශයක් අවශ්ය වේ. ගෝලීය ආර්ථිකයේ සිදුවන මෙවැනි වෙනස්කම් හමුවේ, අපනයන ක්ෂේත්රයේ තරගකාරිත්වය පවත්වා ගැනීමට සහ ඉදිරි ආර්ථික අවදානම් අවම කර ගැනීමට ශ්රී ලංකාව සූදානම් විය යුතු කාලය එළඹ ඇත.
