අක්ෂි රෝග සඳහා ජාතික මට්ටමේ සේවාවන් සපයන සීදුව විජය කුමාරතුංග අනුස්මරණ රෝහලේ අක්ෂි සායන සේවාවන් වඩාත් කාර්යක්ෂම සහ ගුණාත්මක තලයකට ඔසවා තැබීමේ අරමුණින් “අක්ෂි සායනය ඩිජිටල්කරණය කිරීමේ ව්යාපෘතිය” පසුගියදා (04) නිල වශයෙන් ජනතා අයිතියට පත් කෙරිණි. හිටපු ජනාධිපතිනි චන්ද්රිකා බණ්ඩාරනායක කුමාරතුංග මැතිණියගේ ප්රධානත්වයෙන් මෙම සමාරම්භක අවස්ථාව පැවැත්විණි.
රෝහල් අධ්යක්ෂ මණ්ඩලයේ සාමාජික නීල් උමගිලිය මහතාගේ රුපියල් මිලියන දෙකක මූල්ය පරිත්යාගයකින් මෙම ඩිජිටල්කරණ කටයුතු ක්රියාත්මක කෙරිණි. පසුගිය මාස 06ක කාලය පුරා නියමු ව්යාපෘතියක් ලෙස ක්රියාත්මක කරමින්, රෝහල් කාර්ය මණ්ඩලයට අවශ්ය ප්රායෝගික පුහුණුව ද ලබා දීමට කටයුතු කර ඇත.
මෙම ඩිජිටල්කරණය හරහා රෝගී දත්ත සහ වෛද්ය වාර්තා ඩිජිටල් ක්රමවේද ඔස්සේ කළමනාකරණය කිරීම නිසා රෝගීන්ට දිගු පෝලිම්වල රැඳී නොසිට කඩිනම් සේවාවක් ලබා ගැනීමට අවස්ථාව සැලසේ. රෝගීන් ලියාපදිංචිය, සායනික වාර්තා නඩත්තුව සහ ඖෂධ නිකුත් කිරීමේ ක්රියාවලිය ද මෙහිදී සම්පූර්ණයෙන්ම ඩිජිටල්කරණය කර ඇත. තවද, ඇසේ සුද ඉවත් කිරීම සහ දියවැඩියා අක්ෂි රෝග වැනි ප්රතිකාර සඳහා වඩාත් නිවැරදි සහ කාර්යක්ෂම සේවාවක් ලබා දීමට මෙමගින් හැකියාව ලැබේ.
ලෝක සෞඛ්ය සංවිධානයේ තාක්ෂණික සහාය ඇතිව ශ්රී ලංකාවේ සමස්ත සෞඛ්ය පද්ධතියම ඩිජිටල්කරණය කිරීමේ ජාතික වැඩපිළිවෙළට සමගාමීව සෞඛ්ය හා ජනමාධ්ය අමාත්යාංශයේ සෘජු අධීක්ෂණය යටතේ මෙම ව්යාපෘතිය ක්රියාත්මක වේ.
මීට අමතරව, රෝහලේ සමස්ත ප්රතිකාර සේවාවන් ඩිජිටල්කරණය කිරීම පිළිබඳව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා සහ රෝහල් අධ්යක්ෂ මණ්ඩල සභාපතිනි චන්ද්රිකා බණ්ඩාරනායක කුමාරතුංග මහත්මියගේ ප්රධානත්වයෙන් පසුගියදා විශේෂ සමාරලෝචන සාකච්ඡාවක් ද පැවැත්විණි. මෙම අවස්ථාවට වැඩබලන රෝහල් අධ්යක්ෂ වෛද්ය ඩී. ජී. ඒ. රණේ මහතා ඇතුළු අක්ෂි ඒකකයේ විශේෂඥ වෛද්යවරුන් සහ කාර්ය මණ්ඩලය එක්ව සිටියහ.
