ශ්රී ලංකාවේ ආර්ථිකය යනු තවමත් දැඩි සත්කාර ඒකකයේ සිටින රෝගියෙකුට සමාන බව හිටපු ජනාධිපති රනිල් වික්රමසිංහ පවසා තිබේ.
ඉන්දියාව ශ්රී ලංකාවේ මිත්රයෙකු වන අතර, මෙරටට අවශ්ය ඕනෑම අවස්ථාවක ඉන්දියාව සහය ලබා දෙන බව හෙතෙම තවදුරටත් සඳහන් කළේය.
බන්ධුල ගුණවර්ධන මහතා විසින් රචිත “ශ්රී ලංකා ආර්ථිකයේ පංචායුධය” ග්රන්ථය එළිදැක්වීමේ උත්සවයට සහභාගී වෙමින් ඔහු මේ බව පැවසිය.
අදාල අවස්ථාවේ දී මාධ්යවේදියෙකු නැගු ප්රශ්නයක් සදහා හිටපු ජනාධිපතිවරයා පිළිතුරු දුන්නේ මෙසේය.
මේ රටේ දියුණුවක් ඇති කිරීමට මෙන්ම පුද්ගල ආදායම වැඩි කිරීමට නම් ආර්ථික වර්ධනයක් අවැසි බවත් එකී කාර්යට සිදු කිරිමට නම් තාක්ෂණය මෙන්ම ප්රාග්ධනය තිබිය යුතුයි. නමුත් නමුත් අප සතුව ඒවා නැහැ. එහෙනම් ඒවා බාහිරින් ලබා ගත යුතුයි. චීනයත්, ඉන්දියාවත්, වියට්නාමයත් එසේ බාහිරින් ලබා ගත්තා. ආයෝජකයන්ට අපි විශ්වාසය ලබා දිය යුතුයි. එම විශ්වාසය බිඳ දැමීම සාධාරණද?
“අපි මේ ආර්ථිකයට කරලා තියෙන්නේ. ඔක්සිජන් දුන්නු ඒ රෝගියාගේ වයර් ගලවලා,ඔක්සිජන් දෙන එක නතර කරලා දැන් ඉන්නේ දැඩි සත්කාර ඒකකයේ. එතැන ඉද්දීත් බලන්න ඕනේ කොහොමද අපේ ආර්ථිකයේ හෘදය ක්රියාත්මක වන්නේ කියලා. ස්ථාවරභාවය ඇතිවී තිබුණත් රෝගියාට තවම හිටගන්න බෑ. රෝගියා නැගිට්ටුවන එක මේ ආණ්ඩුවේ වගකීමක්. ඒක හරියට කළ යුතුයි. අඩු ගානේ දැඩි සත්කාර ඒකකයෙන් කාමරයකට යන්න රෝගියා සනීප වෙන්න ඕනේ. කාමරේට දැම්මාට පස්සේ තමයි හොඳට කාලා බීලා,මහත්වෙලා පිටවෙලා යන්න පුළුවන් වෙන්නේ.
මේ රටේ දියුණුවක් ඇති කිරීමට සහ පුද්ගල ආදායම වැඩි කිරීමට නම්, ආර්ථික වර්ධනයක් අවශ්යයි. ආර්ථිකය වර්ධනය කිරීමට නම් අපට ප්රාග්ධනය සහ තාක්ෂණය තිබිය යුතුයි.
මා රට හැර ගිය විට සමහරු ඇසුවා, ‘දැන් ඉන්දියාවට විරුද්ධද?’ කියලා. එවැනි මතයක් ලබා දීම හොඳ නැහැ. අපේ ආසන්නතම රට චීනය, ජපානය හෝ ඇමරිකාව නොව, ඉන්දියාවයි. අද ඉන්දියාවේ දළ දේශීය නිෂ්පාදිතය ට්රිලියන 3.5ක්. 2050 වන විට එය නව ගුණයකින් වැඩි වෙනවා. මේ ධාරාවට එකතු වුණොත්, 2060 වන විට අපට ඩොලර් ට්රිලියනයක ආර්ථිකයක් ගොඩනඟන්න බැරිද? රුසියාවට හෝ ඇමරිකාවට එල්ලෙන්නද? ඔවුන් අපට ආසන්න නැහැ. ඉන්දියාව සමඟ එක්ව, ඉන්දුනීසියාව වැනි රටවල් සමඟ ගනුදෙනු කරමින් අපි දියුණු විය යුතුයි.”
