මෙරටට ඉතාමත් හොඳින් වගා කළ හැකි බෝගයක් වන බඩඉරිඟු මෙතෙක් අපේ රටේ ජාතික අවශ්‍යතාවයට සරිලන පරිදි වගා කර නොමැති බවත් 2017 වසරේ මෙරට බඩඉරිඟු වගා කරන ලද ඉඩම් ප්‍රමාණය අක්කර 150,000ක් බව කෘෂි කර්ම අමාත්‍යංශය පවසයි.

එම අමාත්‍යංශය පැවසුවේ ඉන් ලද අස්වැන්න ප්‍රමාණවත් නොවූ බැවින් 2017 වසරේ දී බඩඉරිඟු මෙ.ටො.164,000ක් මෙරටට ආනයනය කර තිබෙන අතර ඒ සඳහා වැය කරන ලද මුදල රු.මි. 23,000 ක් බවයි.

මෙවර මහ කන්නයේ දී මෙරට බඩඉරිඟු වගා කෙරෙන අක්කර ප්‍රමාණය 2,50,000ක් දක්වා ඉහළ නංවා තිබෙන අතර එමඟින් ජාතික අවශ්‍යතාවය සියයට 50ක් සපුරා ගැනීමට හැකි වෙතැයි කෘෂිකර්ම අමාත්‍යාංශය අපේක්ෂා කරන බව පවසයි.

එම නිසා මෙම මහ කන්නය තුළ වගා කර තිබෙන බඩඉරිඟු අක්කර ප්‍රමාණය ලක්ෂයකින් ඉහළ ගොස් ඇති නිසා ලබන වසරේ දී මෙරටට ආනයනය කෙරෙන බඩඉරිඟු ප්‍රමාණය සියයට 50න් අවම කිරීමට හැකියාව ලැබේ.

අප රටේ බඩඉරිඟු වගාවට විශාල හානියක් කළ හැකිව තිබූ “සේනා දළඹු” වසංගතය මේ වන විට පාලනය කිරීමට කෘෂිකර්ම දෙපාර්තමේන්තුවට හැකි වී ඇති අතර සේනා දළඹු වසංගතය නිසා බඩඉරිඟු අක්කර දෙදහසකට පමණ හානි සිදු වී ඇතැයි වාර්තා වේ.

නමුත් බඩඉරිඟු සමස්ත අස්වැන්න කෙරෙහි ඉන් බලපෑමක් එල්ල නොවන බව තහවුරු වී ඇති අතර දැනට පවතින යහපත් කාලගුණික තත්ත්වය හේතුවෙන් බඩඉරිඟු අස්වැන්න ඉහළ යා හැකි බව ජාතික ආහාර ප්‍රවර්ධන මණ්ඩලය පවසයි.