ජර්මනියේ වෙසෙන සිරියානු සරණාගතයින්ගෙන් 80%ක් පමණ ඉදිරි වසර තුනක කාලය තුළ නැවත සිරියාව බලා යනු ඇතැයි තමන් බලාපොරොත්තු වන බව ජර්මන් චාන්සලර් ෆ්රෙඩ්රික් මර්ස් ඊයේ (30) ප්රකාශ කළේය. බර්ලින් නුවරදී සිරියානු ජනාධිපති අහමඩ් අල්-ෂාරා (Ahmed al-Sharaa) හමුවී පැවැත්වූ සාකච්ඡාවකින් අනතුරුව ඔහු මේ බව සඳහන් කළේය.
සිරියානු සිවිල් යුද්ධය අවසන් වී වසරකට වැඩි කාලයක් ගතවී ඇති බැවින් එරට තත්ත්වය දැන් මූලික වශයෙන් වෙනස් වී ඇති බවත්, එබැවින් සරණාගතයින්ට ලබා දෙන ආරක්ෂාව පිළිබඳව නැවත තක්සේරු කළ යුතු බවත් චාන්සලර්වරයා පෙන්වා දුන්නේය. මෙහිදී ප්රමුඛතාවය ලබා දෙන්නේ පදිංචි බලපත්ර නොමැති සහ විවිධ අපරාධවලට සම්බන්ධ වූ පුද්ගලයින් යළි හරවා යැවීමටයි. කෙසේ වෙතත්, සිරියාවේ යටිතල පහසුකම් යළි ගොඩනැඟීම සඳහා සිරියානු වෘත්තිකයින්ගේ දායකත්වය බෙහෙවින් අවශ්ය බව ජනාධිපති අල්-ෂාරා මෙහිදී අවධාරණය කළේය.
ජර්මනියේ සේවය කරන සිරියානු වෛද්යවරුන් සහ හෙද සේවකයින් වැනි අත්යවශ්ය වෘත්තිකයින්ට අවශ්ය නම් ජර්මනියේම රැඳී සිටීමට අවස්ථාව පවතින බව ද මෙහිදී සාකච්ඡා විය. නමුත් ජර්මනියේ විපක්ෂ කණ්ඩායම් පෙන්වා දෙන්නේ සිරියාවේ පවතින අස්ථාවර ආරක්ෂක තත්ත්වය සහ යටිතල පහසුකම් හිඟකම හේතුවෙන් බොහෝ පිරිසකට යළි යාම ප්රායෝගික නොවන බවයි.
