මාතර ප්රදේශයේදී නියමිත මිල ලේබල් ඉවත් කර වංචනික ලෙස තොරතුරු වෙනස් කරමින් අලෙවි කිරීමට සූදානම් කර තිබූ යුරියා පොහොර තොගයක් වැටලීමට පාරිභෝගික සේවා අධිකාරිය (CAA) සමත්ව තිබේ.
පසුගිය මාර්තු 30 වැනිදා ලැබුණු පැමිණිල්ලකට අනුව මාතර දිස්ත්රික් කාර්යාලයේ විමර්ශන නිලධාරීන් විසින් මෙම විශේෂ මෙහෙයුම ක්රියාත්මක කර ඇත. වැටලීම සිදු කරන අවස්ථාවේදී පාරිභෝගික ආරක්ෂණ රෙගුලාසි උල්ලංඝනය කරමින් සකස් කර තිබූ කිලෝග්රෑම් 50 බරැති යුරියා පොහොර මලු 179ක් බලධාරීන් භාරයට ගෙන තිබේ.
මෙම වංචනික ක්රියාවට වගකිව යුතු පුද්ගලයන්ට එරෙහිව දැඩිව නීතිය ක්රියාත්මක කරන බවත්, අත්අඩංගුවට ගත් පොහොර තොගය සහ සැකකරුවන් මාතර මහේස්ත්රාත් අධිකරණය වෙත ඉදිරිපත් කිරීමට නියමිත බවත් පාරිභෝගික සේවා අධිකාරිය සඳහන් කරයි. විශේෂයෙන්ම කෘෂිකාර්මික කටයුතුවල නිරත ගොවීන් සහ පාරිභෝගිකයන් නොමඟ යවමින් වැඩි මිලට භාණ්ඩ අලෙවි කරන මෙවැනි ව්යාපාරිකයන්ට එරෙහිව ඉදිරියටත් දැඩි පියවර ගන්නා බව බලධාරීහු අවධාරණය කරති.
