ශ්රී ලංකාවේ පළාත් පාලන ආයතන මගින් එක්රැස් කරනු ලබන කසළ ඵලදායී සම්පතක් බවට පත් කර ගැනීම සඳහා දකුණු කොරියාවේ විශේෂඥ සහාය ලබා දීමේ සුවිශේෂී ව්යාපෘතියක් අද (01) ආරම්භ විය. දකුණු කොරියාවේ කුමී විශ්වවිද්යාලය, නැනෝටෙක් ආයතනය සහ හන්යොන් අධ්යාපන පදනම නියෝජනය කරමින් පැමිණි නියෝජිත පිරිසක් බේරුවල නගර සභා භූමියේදී මෙහි මූලික පියවර තැබූහ.
කසළ කළමනාකරණය පිළිබඳ නවීන දැනුම සහ අත්දැකීම් මෙරටට ලබා දීම මෙහි ප්රධාන අරමුණයි. විශේෂයෙන්ම නැනෝ තාක්ෂණය (Nano Technology) භාවිත කරමින් කසළ දහනය කිරීම සහ එමගින් ප්ලාස්ටික් නිෂ්පාදනය කර ගැනීම වැනි උසස් තාක්ෂණික ක්රමවේද පිළිබඳව කළුතර දිස්ත්රික්කයේ පළාත් පාලන නියෝජිතයන් දැනුවත් කිරීම සඳහා බේරුවලදී විශේෂ වැඩමුළුවක් ද සංවිධානය කර තිබුණි.
බේරුවල නගරාධිපති එන්.ඒ.එම්. මාබාසිම් මහතා ඇතුළු නිලධාරීන් පිරිසක් මෙම අවස්ථාවට එක්ව සිටි අතර, මෙම ව්යාපෘතිය මගින් මෙරට නගර සභා සහ ප්රාදේශීය සභා මුහුණ දෙන කසළ ගැටලුවට තිරසාර විසඳුමක් ලැබෙනු ඇතැයි අපේක්ෂා කෙරේ. කසළ යනු බැහැර කළ යුතු දෙයක් නොව, නිසි කළමනාකරණය තුළින් ආර්ථික ප්රතිලාභ ලැබිය හැකි සම්පතක් බව මෙහිදී අවධාරණය කෙරිණි.
