එංගලන්ත සුදු පන්දු කණ්ඩායමේ නායක හැරී බෲක් සහ තුන් ඉරියව් ක්රීඩක ජැකොබ් බෙතෙල් හට නවසීලන්ත සංචාරයේදී සිදුකළ විනය විරෝධී හැසිරීම් සම්බන්ධයෙන් ක්රිකට් නියාමන ආයතනය (Cricket Regulator) විසින් නිල වශයෙන් අවවාද කර තිබේ. පසුගිය වසරේ නවසීලන්තයේ පැවැති එක්දින තරඟාවලියක් අතරතුර රාත්රී සමාජ ශාලාවකදී ඇති වූ ගැටුමක් සම්බන්ධයෙන් සිදුකළ දීර්ඝ විමර්ශනයකින් පසු මෙම පියවර ගෙන ඇත. අදාළ සිදුවීමේදී හැරී බෲක් හට ආරක්ෂක නිලධාරියෙකුගෙන් ප්රහාරයක් එල්ල වී ඇති අතර එම අවස්ථාවේදී ඔහු සමඟ තවත් ක්රීඩකයින් සිටි බව පසුව අනාවරණය විය.
මෙම සිදුවීම සම්බන්ධයෙන් හැරී බෲක් හට මීට පෙර දඩ මුදලක් සහ අවසන් අවවාදය ද නිකුත් කර තිබූ අතර ඔහු ප්රසිද්ධියේ ජනතාවගෙන් සමාව අයැද සිටියේය. මුලදී තමන් තනිව සිටි බව පැවසුවද පසුව තම සගයන් ආරක්ෂා කිරීම සඳහා එසේ අසත්ය ප්රකාශ කළ බව ඔහු පිළිගත්තේය. මෙම විනය පරීක්ෂණයට වේග පන්දු යවන ක්රීඩක ජොෂ් ටොංග් ද ඇතුළත් වූ නමුත් ඔහුට එරෙහිව වැඩිදුර ක්රියාමාර්ග නොගැනීමට බලධාරීන් තීරණය කර ඇත.
එංගලන්ත ක්රිකට් කණ්ඩායමේ කළමනාකාර අධ්යක්ෂ රොබ් කී පවසන්නේ ක්රිකට් ක්රීඩකයින් සහ මත්පැන් අතර පවතින සබඳතාවය පාලනය කිරීම පහසු නොවන නමුත් ක්රීඩකයින් තම වගකීම් පිළිබඳව මීට වඩා සැලකිලිමත් විය යුතු බවයි. අළු බඳුන තරඟාවලියේදී එංගලන්තය ලැබූ පරාජයත් සමඟ ක්රීඩකයින්ගේ පිටියේ පිටත හැසිරීම් පිළිබඳව ප්රේක්ෂකයින් සහ විචාරකයින් දැඩි විවේචන එල්ල කරමින් සිටී. මෙම අවවාද කිරීමත් සමඟ ඉදිරියේදී එංගලන්ත ක්රීඩකයින්ගේ විනය සම්බන්ධයෙන් දැඩි නීති රීති ක්රියාත්මක වනු ඇතැයි අපේක්ෂා කෙරේ.
