ලංකා ගුරුසේවා සංගමයේ පාලනය යටතේ පවතින අධ්යාපන සමුපකාරය, පසුගිය මාස 9ක කෙටි කාලය තුළ සුවිශේෂී මූල්ය සහ සේවා ප්රගතියක් අත්කරගෙන ඇති බව වාර්තා වේ. සමිතියේ මුළු වත්කම රුපියල් බිලියන 27 සිට බිලියන 34 දක්වා ශීඝ්රයෙන් වර්ධනය කර ගැනීමට පාලනාධිකාරිය සමත්ව ඇති අතර, සාමාජිකයන් වෙනුවෙන් ලබාදෙන දේපොළ, ඇපකර සහ භාණ්ඩ ණය සීමාවන් ද සැලකිය යුතු ලෙස ඉහළ නංවා තිබේ. විශේෂයෙන්ම ණය කළඹ 78%කින් වර්ධනය කරමින් එය රුපියල් මිලියන 34,000 දක්වා ඉහළ නංවා ඇති අතර, මහජන බැංකුවෙන් අඩු පොළියට ලබාගත් රුපියල් මිලියන 4,000ක ණය මුදල සමිතියේ මූල්ය ශක්තිය තවදුරටත් තහවුරු කර ඇත.
සාමාජික සුබසාධනය වෙනුවෙන් සුවිශේෂී පියවර රැසක් ගෙන ඇති අතර, ‘දිට්වා’ සුළි කුණාටුවෙන් පීඩාවට පත් සාමාජිකයන් 4,033 දෙනෙකුට රුපියල් මිලියන 56.9ක නොමිලේ ආපදා ආධාර ලබාදීම කැපී පෙනේ. මීට අමතරව, 3%ක ඉතා අඩු පොළියක් යටතේ ණය පහසුකම් සැපයීම සහ නව ළමා තැන්පතු ගිණුම් 9,555ක් ආරම්භ කිරීම හරහා මූල්ය පදනම ශක්තිමත් කර තිබේ. සමිතියේ ශාඛා ජාලය 39ක් දක්වා පුළුල් කිරීමේ අරමුණින් මහරගම 25 වන ශාඛාව විවෘත කර ඇති අතර, ඉදිරියේදී වව්නියාවේ නව ශාඛාවක් විවෘත කිරීමට ද කටයුතු සූදානම් කර ඇත. ඩිජිටල්කරණ ව්යාපෘතිය පරීක්ෂණ මට්ටමට පැමිණීම හරහා ඉදිරියේදී සේවාවන් වඩාත් කාර්යක්ෂම වනු ඇත.
කාර්ය මණ්ඩල සුබසාධනය සම්බන්ධයෙන් ද නව පාලනාධිකාරිය විප්ලවීය වෙනසක් සිදුකර ඇති අතර, වසර 15කට පසු පුහුණු වැඩසටහන් ආරම්භ කරමින් සේවක වැටුප් 90%ත් 120%ත් අතර ප්රමාණයකින් වැඩි කිරීමට කටයුතු කර තිබේ. එළඹෙන සිංහල සහ දෙමළ අලුත් අවුරුද්ද වෙනුවෙන් 2019 වසරේ ප්රසාද දීමනා සහ රුපියල් 7,500ක අවුරුදු මල්ලක් ලබාදීමට පියවර ගෙන ඇත. අක්කර 50ක කෘෂි උද්යාන ව්යාපෘතියක්, සෝලර් පැනල් සඳහා ණය සහන සහ රක්ෂණාවරණ වැනි අනාගත ව්යාපෘති රැසක් ද සමඟින් අධ්යාපන සමුපකාරය සිය සාමාජිකයන්ගේ ආර්ථික නිදහස වෙනුවෙන් නව මාවතක් විවර කරමින් සිටී.
