අතිශය උද්යෝගිමත් තරගයකින් පසු සැන් ඇන්ටෝනියෝ ස්පර්ස් කණ්ඩායමේ පිට පිට තරග 11 ක ජයග්රාහී ගමන නතර කිරීමට ඩෙන්වර් නගට්ස් කණ්ඩායම සමත් වී තිබේ. මෙහිදී ලීගයේ වටිනාම ක්රීඩකයා හෙවත් එම්.වී.පී. සම්මානය සඳහා ප්රධාන වශයෙන්ම තරග වදින ක්රීඩකයින් දෙදෙනෙකු වන නිකොලා ජොකික් සහ වික්ටර් වෙම්බන්යාමා එකිනෙකාට එරෙහිව විශිෂ්ට දක්ෂතා දැක්වීම විශේෂත්වයකි.
තෙවරක්ම ලීගයේ වටිනාම ක්රීඩකයා ලෙස සම්මාන දිනූ සර්බියානු ජාතික ජොකික්, මෙම තරගයේදී ඩෙන්වර් කණ්ඩායම වෙනුවෙන් ලකුණු 40 ක් ලබා ගනිමින් කැපී පෙනෙන දක්ෂතා දැක්වූයේය. අතිකාල දක්වා ඇදී ගිය මෙම උණුසුම් තරගයෙන් ඩෙන්වර් කණ්ඩායම ලකුණු 136-134 ක් ලෙස ජයග්රහණය වාර්තා කළේ ඔවුන්ගේ පිට පිට 8 වන ජයග්රහණයද සනිටුහන් කරමිනි. ප්රංශ ජාතික වෙම්බන්යාමා ස්පර්ස් කණ්ඩායම වෙනුවෙන් ලකුණු 34 ක් රැස් කරමින් පෙරමුණ ගත් අතර, තරගයේ සිව්වන වටයේදී ඔවුන් ලකුණු 107-96 ක් ලෙස ඉදිරියෙන් සිටියද එම වාසිය අවසන් මොහොතේ ගිලිහී ගියේය.
තරගයෙන් අනතුරුව මෙම සුපිරි ක්රීඩකයින් දෙදෙනාම එකිනෙකාගේ දක්ෂතා දැඩි ලෙස ඇගයීමට ලක් කිරීමටද අමතක නොකළහ. ජොකික් සඳහන් කළේ වෙම්බන්යාමාට එරෙහිව ක්රීඩා කළ පළමු දවසේදීම ඔහු මේ ක්රීඩාව සම්පූර්ණයෙන්ම වෙනස් කරන බව තමා දැන සිටි බවත්, පැසිපන්දු ඉතිහාසයේ බිහි වූ සුවිශේෂීම ක්රීඩකයා වීමට ඔහුට අවස්ථාවක් පවතින බවත්ය. ඒ වෙනුවෙන් අදහස් දැක්වූ වෙම්බන්යාමා කියා සිටියේ මෙය තමා ක්රීඩා කළ සුපිරිම සහ විනෝදජනකම තරගයක් බවත්, ලෝකයේ ඉන්න හොඳම ප්රහාරාත්මක ක්රීඩකයා වන ජොකික් සිටින කණ්ඩායමකට එරෙහිව ක්රීඩා කිරීමට ලැබීම විශාල අත්දැකීමක් බවත්ය. මෙම කණ්ඩායම් දෙකම මේ වන විටත් අප්රේල් 18 වනදා ආරම්භ වන ප්ලේ-ඕෆ් වටය සඳහා සුදුසුකම් ලබා අවසන්ය.
