දකුණු ලෙබනනයේ සිවිල් වැසියන් ඉලක්ක කරගනිමින් ඊශ්රායලය එල්ල කරන ප්රහාරවලට ප්රතිචාර ලෙස, හිස්බුල්ලා සංවිධානය විසින් හඳුනාගැනීමට අතිශය අපහසු අති නවීන “මරාගෙන මැරෙන” (Kamikaze) ඩ්රෝන යානයක් ප්රථම වරට මෙහෙයුම් සඳහා යොදාගෙන තිබේ. පසුගිය සඳුදා උතුරු දිග ඊශ්රායලයේ හමුදා මධ්යස්ථාන ඉලක්ක කරගනිමින් එල්ල කළ ප්රහාර මාලාවකදී මෙම නවීන ගුවන් අවිය ප්රදර්ශනය කර ඇති බව වාර්තා වේ.
ඊශ්රායලයේ ‘කාන්’ පුවත් සේවය පෙන්වා දෙන්නේ, මෙම නව ඩ්රෝන යානය විද්යුත් චුම්භක බාධා කිරීම් (Electronic Jamming) හමුවේ පවා ක්රියා කළ හැකි දෘශ්ය මග පෙන්වීමේ පද්ධතියකින් සමන්විත බවයි. රේඩාර් පද්ධතිවලට හසු නොවී ගමන් කිරීම, කිලෝමීටර් ගණනාවක දුරක් පියාසර කිරීමේ හැකියාව සහ ගොඩනැගිලි අභ්යන්තරයේ පවා හැසිරවිය හැකි වීම මෙහි ඇති සුවිශේෂී තාක්ෂණික ලක්ෂණයන් වේ.
සඳුදා අලුයම සිට කිරියාත් ෂ්මෝනා, මෙටුලා සහ ටයිබීරියස් ඇතුළු ප්රදේශ රැසකට මෙම ප්රහාර එල්ල වී ඇති අතර, ගෝලානි බලසේනාවට අයත් පුහුණු මධ්යස්ථාන ද හිස්බුල්ලා ඉලක්ක බවට පත් විය. ඊශ්රායල ආරක්ෂක පද්ධතිවලට බාධා කළ හැකි වූයේ මෙයින් සුළු ඩ්රෝන ප්රමාණයකට පමණක් බව මාධ්ය වාර්තා පෙන්වා දෙයි. ලෙබනනයට එරෙහි ආක්රමණ නතර වන තුරු මෙම ප්රතිප්රහාර අත් නොහරින බව හිස්බුල්ලා මහලේකම් ෂෙයික් නයිම් කාසම් අවධාරණය කර සිටී.
