ආන්දෝලනාත්මක ගල් අඟුරු ආනයනය සම්බන්ධයෙන් ඉදිරිපත් කෙරුණු විගණකාධිපති වාර්තාවේ ඇතැම් කොටස් සහ කරුණු පිළිගත නොහැකි බව වෙළඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහ මහතා ප්රකාශ කළේය. පෞද්ගලික රූපවාහිනී වැඩසටහනකට එක්වෙමින් අමාත්යවරයා අවධාරණය කළේ අදාළ වාර්තාවේ වංචාවක් සිදුව ඇති බවට සඳහන්ව නොමැති බවත්, එහි දක්වා ඇත්තේ විය හැකි තත්ත්වයන් පිළිබඳ කරුණු පමණක් බවත්ය.
මෙම ගනුදෙනුව තුළ කිසිදු වංචාවක් සිදුව නොමැති බව රජයේ ස්ථාවරය බවත්, ප්රසම්පාදන ක්රියාවලිය නිසි පරිදි අනුගමනය කර ඇති බවත් ඔහු මෙහිදී පෙන්වා දුන්නේය. ප්රසම්පාදන කොමිෂන් සභාව 2025 අගෝස්තු මාසයේ නිකුත් කළ ලිපියක් පදනම් කර ගනිමින් විගණන වාර්තාවේ අදාළ ඉදිරිපත් කිරීම්වල දෝෂ පවතින බව අමාත්යවරයා පැවසීය. සම්පූර්ණ වාර්තාවම වැරදි බව තමන් ප්රකාශ නොකරන නමුත්, එහි අඩංගු ඇතැම් නිගමන වැරදි බව ඔහු වැඩිදුරටත් සඳහන් කළේය.
