ලෝකයේ සාමාන්ය ආයු අපේක්ෂාව ක්රමයෙන් ඉහළ ගියද, මිනිසෙකුට ජීවත් විය හැකි උපරිම ආයු කාලය (Maximum lifespan) දශක කිහිපයක සිට වසර 120ක පමණ සීමාවක පවතින බව විද්යාඥයෝ පෙන්වා දෙති. මෙම සීමාව බිඳ දමා උපරිම ආයු කාලය අවුරුදු 130 දක්වා හෝ ඊට එහාට ගෙන යා හැකි තාක්ෂණයන් පිළිබඳව මේ වන විට ලොව පුරා දැඩි අවධානයක් යොමු වී තිබේ.
19 වැනි සියවසේදී වසර 40කට වඩා අඩු මට්ටමක පැවති සාමාන්ය ආයු අපේක්ෂාව, 2024 වන විට වසර 73.3 දක්වා ඉහළ ගොස් ඇත. ජපානය සහ හොංකොං වැනි රටවල මෙය වසර 85ක් පමණ වේ. කෙසේ වෙතත්, උපරිම ආයු සීමාව තවමත් වසර 120 ආසන්නයේ පවතී. මෙතෙක් නිල වශයෙන් වාර්තා වී ඇති වැඩිම ආයු කාලය හිමි පුද්ගලයා වන්නේ වයස අවුරුදු 122ක් ජීවත් වූ ප්රංශයේ ජීන් කැල්මන්ට් මහත්මියයි.
‘Life Biosciences’ ආයතනය සෛලවල ජෛව විද්යාත්මක වයස ආපසු හැරවිය හැකි (Reverse biological age) ප්රතිකාර ක්රමයක් පිළිබඳ සායනික පරීක්ෂණ සඳහා සූදානම් වේ. මෙය සාර්ථක වුවහොත් සෛල නැවත තරුණ තත්ත්වයට පත් කිරීමේ හැකියාව ලැබෙනු ඇත. මීට අමතරව, ‘Rubedo Life Sciences’ ආයතනය විසින් නිපදවන ලද RLS-1496 ඖෂධයේ මූලික පරීක්ෂණ ද සාර්ථක වී ඇති අතර, එය වයස්ගත වීම නිසා සිදුවන සෛලීය හානි අවම කිරීමට සමත් බව හඳුනාගෙන ඇත.
LEV පදනම සහ Human Longevity ආයතනය එක්ව වයස අවුරුදු 100 සිට 110 දක්වා වූ පුද්ගලයන් පිළිබඳව විශේෂ පර්යේෂණයක් ආරම්භ කර තිබේ. එක් එක් පුද්ගලයා වයසට යන වේගය වෙනස් වන්නේ ඇයිද යන්න සහ එම ක්රියාවලිය ප්රමාද කිරීමට ගත හැකි පියවර හඳුනා ගැනීම මෙහි මූලික අරමුණයි.
වර්තමාන වෛද්ය විද්යාවට අනුව මිනිසෙකුට අවුරුදු සිය ගණනක් ජීවත් වීමට ඇති ඉඩකඩ තවමත් සීමිතය. කෙසේ වෙතත්, වෛද්ය විද්යාවේ සහ තාක්ෂණයේ සිදුවන මෙම ශීඝ්ර දියුණුව දිගටම පැවතුණහොත්, අනාගතයේදී මිනිස් ආයු සීමාව වසර 130 සීමාව ද ඉක්මවා යනු ඇතැයි විද්යාඥයෝ විශ්වාස කරති.
