ක්වොන්ටම් පරිගණක (Quantum Computers) විශාල පරිමාණයෙන් නිර්මාණය කිරීමේදී පවතින ප්රධාන බාධකයක් වන ලේසර් පාලනය (Laser control) ඉතා පහසු කළ හැකි අතිශය කුඩා ඔප්ටිකල් චිපයක් පර්යේෂකයින් විසින් නිපදවා තිබේ. වර්ග මිලිමීටර් 1ක් පමණ වන, එනම් සාමාන්ය ලුණු කැටයකට වඩා කුඩා මෙම චිපය මගින් ක්වොන්ටම් පද්ධතිවල සංකීර්ණත්වය සහ බලශක්ති පිරිවැය විශාල වශයෙන් අඩු කිරීමට අපේක්ෂා කෙරේ.
ඇමරිකාවේ MITRE ආයතනය, MIT සහ සැන්ඩියා ජාතික රසායනාගාරය එක්ව ක්රියාත්මක කරන ‘Quantum Moonshot’ ව්යාපෘතිය යටතේ මෙම තාක්ෂණය නිපදවා ඇත. මිලියන සංඛ්යාත ‘Qubits’ පාලනය කිරීම සඳහා දැනට පවතින එක් එක් ලේසර් කිරණ වෙනුවට, මෙම චිපය මගින් ඉතා සුළු ලේසර් කිරණ සංඛ්යාවක් භාවිතා කරමින් ඉලක්කගත ස්ථාන රාශියක් ඉතා වේගයෙන් පාලනය කළ හැකිය.
මෙම චිපය තත්පරයකට ආලෝක ලක්ෂ්ය (Light spots) මිලියන 68.6ක් පමණ පරිලෝකනය (Scan) කිරීමට සමත් වන අතර, එය දැනට පවතින තාක්ෂණයට වඩා 50 ගුණයකටත් වඩා වේගවත් වේ. මෙහි ඇති විශේෂත්වය වන්නේ ආලෝක ප්රභවයන් ප්රමාණය වැඩි නොකර ආලෝක පාලන පරාසය විශාල ලෙස පුළුල් කිරීමයි.
ක්වොන්ටම් පරිගණකවලට අමතරව 3D මුද්රණ කටයුතු වේගවත් කිරීමට, දත්ත මධ්යස්ථානවල කාර්යක්ෂමතාව ඉහළ නැංවීමට සහ සෛල මට්ටමේ රසායනික ප්රතික්රියා මැනීමට (Lab-on-a-chip) මෙම තාක්ෂණය භාවිතා කළ හැකිය. දැනට පර්යේෂණ මට්ටමේ පවතින මෙය වාණිජමය වශයෙන් සාර්ථක වුවහොත් අනාගත පරිගණක යටිතල පහසුකම්වල විශාල වෙනසක් සිදුවනු ඇතැයි අපේක්ෂා කෙරේ.
