වත්මන් රජය බලයට පත්වීමෙන් පසුව රේගු පරීක්ෂාවකින් තොරව වරායෙන් පිටතට මුදාහරින ලද බහලුම් 323ක අතිශය ආන්දෝලනාත්මක සිද්ධිය සම්බන්ධයෙන් පරීක්ෂණ පවත්වන පාර්ලිමේන්තු විශේෂ කාරක සභාව තුළ දැඩි දේශපාලන ගැටුමක් නිර්මාණය වී තිබේ. මෙම සිදුවීම හරහා රටට සිදුවූ අලාභය සහ අනීතික ක්රියාපිළිවෙත සම්බන්ධයෙන් සාක්ෂි දීම සඳහා මුදල් ඇමතිවරයා ලෙස ජනාධිපති අනුර කුමාර දිසානායක මහතා කැඳවීමට විපක්ෂය දැරූ සෘජු උත්සාහයක් හමුවේ ආණ්ඩු පක්ෂ මන්ත්රීවරුන්ගෙන් එල්ල වූයේ දැඩි විරෝධයකි. රේගු පාලනය මුදල් අමාත්යංශය යටතේ පැවතීමත්, රජය නියෝජනය කරමින් වගකිවයුතු පාර්ශ්වයන් මෙම බහලුම් මුදාහැරීම සාධාරණීකරණය කර තිබීමත් නිසා මෙම කැඳවීම අත්යවශ්ය බවට විපක්ෂය තර්ක කර සිටියි.
විපක්ෂ මන්ත්රීවරුන් වන අජිත් පී. පෙරේරා, දයාසිරි ජයසේකර, මුජිබර් රහුමාන් සහ ඩී.වී. චානක යන මහත්වරුන් කාරක සභා සභාපති හර්ෂණ නානායක්කාර මහතාගෙන් ලිඛිතව ඉල්ලා සිටියේ ජනාධිපතිවරයාට අමතරව වරාය භාර ඇමති බිමල් රත්නායක, නියෝජ්ය ඇමති ජනිත් රුවන් කොඩිතුවක්කු සහ මුදල් අමාත්යංශ ලේකම්වරයා ද සාක්ෂි සඳහා කැඳවන ලෙසයි. කන්ටේනර් සිය ගණනක් කිසිදු විධිමත් පරීක්ෂාවකින් තොරව ඉවත් කිරීම හරහා රටේ ආරක්ෂාවට සහ ආර්ථිකයට සිදුවූ හානිය පිළිබඳව ප්රශ්න කිරීම මෙම කැඳවීමේ ප්රධාන අරමුණ වී තිබුණි. කෙසේ වෙතත්, පාර්ලිමේන්තු විශේෂ කාරක සභාව නියෝජනය කරන ආණ්ඩු පක්ෂ මන්ත්රීවරුන්ගේ බහුතර කැමැත්ත මත ජනාධිපතිවරයා ඇතුළු පිරිස කැඳවීමේ ඉල්ලීම මේ වන විට නිල වශයෙන් පරාජය වී තිබේ.
මෙම තීන්දුව සම්බන්ධයෙන් මාධ්ය වෙත අදහස් දැක්වූ අජිත් පී. පෙරේරා මන්ත්රීවරයා අවධාරණය කළේ අදාළ කාලය තුළ වගකීම් දැරූ අමාත්යවරුන් සහ නිලධාරීන් මෙම විමසීමට අත්යවශ්ය සාක්ෂිකරුවන් වන බවයි. වරායේ තදබදය නැති කිරීමේ මුවාවෙන් සිදුවූ මෙම අවිධිමත් බහලුම් මුදාහැරීම පිටුපස සැඟවුණු සැබෑ හේතුව අනාවරණය කර ගැනීමට ඇති ඉඩකඩ මෙලෙස අවහිර කිරීම තුළින් රටේ නීතියේ ආධිපත්යය පිළිබඳව බරපතළ ප්රශ්නාර්ථයක් මතු වන බව විපක්ෂය පෙන්වා දෙයි. බහලුම් 323ක් කිසිදු පරීක්ෂාවකින් තොරව නිදහස් කිරීමේ සැබෑ වගකීම භාර ගන්නේ කවුරුන්ද යන්න පිළිබඳව රටම බලා සිටින මොහොතක, මෙම පරීක්ෂණයේ ඉදිරි ගමන තවදුරටත් දැඩි අවිනිශ්චිතතාවයකට ඇද දමා තිබේ.
