වයස අවුරුදු දෙකක කුඩා දැරියක රුපියල් 40,000ක මුදලකට විකුණා, එම මුදලින් ජංගම දුරකථනයක් මිලදී ගත් පුද්ගලයෙකු, දැරියගේ මව සහ දැරිය මිලදී ගත් කාන්තාව ධර්මපුරම් පොලිසිය මගින් අත්අඩංගුවට ගෙන තිබේ. පොලිසිය විසින් විකුණා දමා තිබූ දැරිය සහ මිලදී ගත් ජංගම දුරකථනය ද සිය භාරයට ගෙන ඇත.
මෙම අමානුෂික අපරාධය සම්බන්ධයෙන් අත්අඩංගුවට ගෙන ඇත්තේ දැරියගේ මව, ඇයගේ අනියම් ස්වාමිපුරුෂයා සහ කොළඹ ප්රදේශයේ පදිංචි දැරිය මිලදී ගත් බව කියන කාන්තාවකි. සැකකාර මව සිය අනියම් ස්වාමිපුරුෂයා සමඟ එක්ව මෙම ජාවාරම සිදු කර ඇති බව මූලික විමර්ශනවලදී අනාවරණය වී තිබේ.
ධර්මපුරම් ග්රාම නිලධාරීවරයා විසින් පොලිස් ස්ථානයට කරන ලද පැමිණිල්ලකට අනුව වහාම ක්රියාත්මක වූ නිලධාරීන් සැකකරුවන් අත්අඩංගුවට ගෙන ඇත. දැරිය විකුණා ලබාගත් මුදලින් රුපියල් 15,000ක් වැය කර ජංගම දුරකථනයක් මිලදී ගෙන ඇති අතර, ඒ පිළිබඳව පොලිසිය ප්රශ්න කිරීමේදී සැකකරුවන් නිරුත්තර වී ඇති බව වාර්තා වේ. සිද්ධිය සම්බන්ධයෙන් ධර්මපුරම් පොලිසිය වැඩිදුර විමර්ශන මෙහෙයවයි.
