ශ්රී ලංකන් ගුවන් සමාගමට එයාර් බස් (Airbus) ගුවන් යානා මිලදී ගැනීමේදී සිදුවූ බව කියන මහා පරිමාණ අල්ලස් සිද්ධිය සම්බන්ධයෙන් රක්ෂිත බන්ධනාගාර ගත කර සිටින එම සමාගමේ හිටපු ප්රධාන විධායක නිලධාරී (CEO) කපිල චන්ද්රසේන මහතා ලබන මැයි මස 05 වන දා දක්වා තවදුරටත් රක්ෂිත බන්ධනාගාර ගත කිරීමට කොළඹ ප්රධාන මහේස්ත්රාත් අධිකරණය නියෝග කළේය. සැකකරුගේ ඇප ඉල්ලීම පිළිබඳ නියෝගය එදිනට ප්රකාශයට පත් කිරීමට නියමිතය.
මේ අතර, අල්ලස් කොමිසම අධිකරණයට දන්වා සිටියේ මෙම නඩුවේ සෙසු සැකකරුවන් වන ප්රියංකා නියෝමාලී විජේනායක සහ ශමින්ද්ර රාජපක්ෂ යන අයට එරෙහිව ජාත්යන්තර රතු වරෙන්තු (Red Notices) ලබා ගැනීමට අවශ්ය කටයුතු මෙම සතිය තුළ අවසන් කරන බවයි. මීට අමතරව, අදාළ අල්ලස් මුදල් තැන්පත් කිරීමට සම්බන්ධ බව කියන, මේ වන විට ඔස්ට්රේලියාවේ වෙසෙන පුද්ගලයෙකුගෙන් ප්රකාශ ලබා ගැනීමට ද පියවර ගනිමින් සිටින බව අල්ලස් කොමිසම වැඩිදුරටත් සඳහන් කළේය.
