මහා භාණ්ඩාගාරයේ ඇමෙරිකානු ඩොලර් මිලියන 2.5ක මුදලක් පරිගණක හැකර් පාර්ශ්වයක් සතු වීමේ සිද්ධිය සම්බන්ධයෙන් කරුණු විමසීම සඳහා රජයේ මුදල් පිළිබඳ කාරක සභාව හෙට (30) රැස්වීමට නියමිත අතර ඒ සඳහා මුදල් අමාත්යාංශ ලේකම් ආචාර්ය හර්ෂණ සූරියප්පෙරුම සහ මහ බැංකු අධිපති ආචාර්ය නන්දලාල් වීරසිංහ පස්වරු 2.00ට එම කාරක සභාව හමුවට කැඳවා ඇති බව එහි සභාපති පාර්ලිමේන්තු මන්ත්රී ආචාර්ය හර්ෂ ද සිල්වා ප්රකාශ කර තිබේ. මෙම සිද්ධියට අදාළව රාජ්ය ණය කළමනාකරණ කාර්යාලයේ නිලධාරීන් පස් දෙනෙකුට කොටුව මහේස්ත්රාත් අධිකරණය විසින් ඊයේ විදෙස් ගමන් තහනමක් පනවනු ලැබූ අතර එම නිලධාරීන්ගේ බැංකු ගිණුම් පරීක්ෂා කරන ලෙසට ද මහේස්ත්රාත්වරයා අපරාධ පරීක්ෂණ දෙපාර්තමේන්තුවට නියෝග කළේය. රජයේ රස පරීක්ෂකවරයා, පරිගණක හදිසි ප්රතිචාර ආයතනයේ (CERT) ප්රධානියා සහ කොළඹ විශ්වවිද්යාලයේ විශේෂඥයින්ගෙන් සමන්විත පරීක්ෂණ කමිටුවක් පත් කිරීමට ද අධිකරණයේ අවසර හිමිව ඇති අතර අපරාධ පරීක්ෂණ දෙපාර්තමේන්තුව මේ සම්බන්ධයෙන් පිටු 27ක වාර්තාවක් අධිකරණයට ඉදිරිපත් කර ඇත. මෙම විමර්ශනය සූක්ෂම සහ සංවේදී එකක් බැවින් අදාළ නඩු ගොනුව සේප්පුවේ තැන්පත් කිරීමට නියෝග කළ මහේස්ත්රාත්වරයා, මෙවැනි වැරදි ඉදිරියට සිදුවීම වැළැක්වීම සඳහා වහාම කෙටි පියවර ගන්නා ලෙස මහ බැංකුවට වැඩිදුරටත් නියෝග කර තිබේ.
