සමගි ජන බලවේගයේ පක්ෂ ප්රතිපත්තීන්ට ගරු කරමින් පක්ෂ සාමාජිකත්වයෙන් ද ඉල්ලා අස්වන ලෙස එම පක්ෂයේ මහලේකම් රංජිත් මද්දුම බණ්ඩාර මහතා විසින් ඉරාන් වික්රමරත්න මහතා වෙත ලිඛිතව දැනුම් දී තිබේ. ඉරාන් වික්රමරත්න මහතා මීට පෙර එම පක්ෂයේ කෘත්යාධිකාරී මණ්ඩලයෙන් සහ කළමනාකරණ කමිටුවෙන් ඉල්ලා අස්වීමට ගත් තීරණය පිළිගනිමින් ඊයේ (29) යොමුකළ පිළිතුරු ලිපියක් මගින් මහලේකම්වරයා මෙම ඉල්ලීම සිදුකර ඇත.
සියලුම ක්රීඩා සංගම් නිර්දේශපාලනය විය යුතු බවත්, දේශපාලනයේ නිරත පුද්ගලයන් එවැනි සංගම්වල තනතුරු දැරීම පක්ෂයේ මූලික ප්රතිපත්තියට පටහැනි බවත් සමගි ජන බලවේගය අවධාරණය කරයි. මේ හේතුවෙන් ඉරාන් වික්රමරත්න මහතා තවදුරටත් පක්ෂ සාමාජිකත්වයේ රැඳී සිටීම සදාචාරාත්මක නොවන බවත්, එබැවින් පක්ෂ සාමාජිකත්වයෙන් ද ඉල්ලා අස්වී එම ප්රතිපත්තිය සුරැකීමට කටයුතු කරන ලෙසත් අදාළ ලිපිය මගින් දැනුම් දී තිබේ.
මෙම තීරණයත් සමඟ සමගි ජන බලවේගය තුළ අභ්යන්තර දේශපාලන සංවාදයක් නිර්මාණය වී ඇති අතර, ක්රීඩා සංගම් සහ දේශපාලනය අතර පවතින සබඳතාව පිළිබඳව පක්ෂය දැඩි ස්ථාවරයක සිටින බව මින් පැහැදිලි වේ. ඉදිරි දේශපාලන කටයුතු සහ පක්ෂයේ විනය ආරක්ෂා කිරීම වෙනුවෙන් මෙම පියවර ගත් බව පක්ෂ ආරංචි මාර්ග වැඩිදුරටත් සඳහන් කරයි.
