ශ්රී ලංකාවේ ජනතාවගේ ඇඟිලි සලකුණු සහ ඇස්වල දත්ත (Biometric Data) ඇතුළත් ජෛවමිතික හැඳුනුම්පත් ව්යාපෘතිය ඉන්දියානු අසාදු ලේඛනගත සමාගමකට පැවරීමට රජය සූදානම් වන බව ජන අරගල ව්යාපාරයේ වසන්ත මුදලිගේ මහතා චෝදනා කරයි. මෙරට ජනතාවගේ පෞද්ගලික දත්ත සොරකම් කර ඒ හරහා මෙරට පාලනය කිරීමට ඉන්දියාවට ඉඩ ප්රස්ථා සලසා දීමට වත්මන් රජය කටයුතු කරමින් සිටින බව ඔහු පවසයි.
2012 වසරේ සිට ක්රියාත්මක වූ ඉලෙක්ට්රොනික හැඳුනුම්පත් ව්යාපෘතිය සඳහා රුපියල් කෝටි 560ක් වැය කර මෘදුකාංග පවා සකසා තිබියදී, එය අවසන් නොකර ජෛවමිතික හැඳුනුම්පත් සැකසීමේ බලය ඉන්දියාවට ලබාදීම ගැටලුසහගත බව ඔහු පෙන්වා දෙයි. විශේෂයෙන්ම අනුර කුමාර දිසානායක මහතා ජනාධිපති වූ පසුව 2025 ජනවාරි මාසයේදී ඉන්දියාව සමඟ අත්සන් කළ ගිවිසුමක් හරහා ටෙන්ඩර් කැඳවීමේ බලය පවා ඉන්දියාවට පවරා ඇති බව මුදලිගේ මහතා අනාවරණය කළේය.
මීට පෙර සුරාබදු වංචාවකට සම්බන්ධ වීම නිසා මෙරට අසාදු ලේඛනගත කරන ලද ‘මැඩ්රාස් සෙකියුරිටි ප්රින්ටර්ස්’ (Madras Security Printers) සමාගමට මෙම ව්යාපෘතිය පැවරීමට උත්සාහ කර ඇති බව ද ඔහු සඳහන් කළේය. අසාදු ලේඛනගත සමාගමක් මෙම ක්රියාවලියට එක් කරගත්තේ කෙසේද යන්න පිළිබඳව සහ ටෙන්ඩර් කැඳවීමේ බලය ඉන්දියාවට පැවරුවේ ඇයිද යන්න පිළිබඳව ජනාධිපතිවරයා වහාම ජනතාවට පැහැදිලි කිරීමක් කළ යුතු බව වසන්ත මුදලිගේ මහතා වැඩිදුරටත් අවධාරණය කළේය.
