සමගි ජන බලවේගයේ මන්ත්රී එරන් වික්රමරත්න මහතා ශ්රී ලංකා ක්රිකට් අතුරු පාලක කමිටුවේ සභාපතිවරයා ලෙස පත්කිරීම පිටුපස බලගතු කාන්තාවක් සිටින බව ශ්රී ලංකා නිදහස් පක්ෂයේ ජාතික සංවිධායක චාමර සම්පත් දසනායක මහතා පවසයි. කැම්බල් පිටියේ පැවති ශ්රී ලංකා නිදහස් පක්ෂ මැයි දින රැලිය අමතමින් ඒ මහතා මේ බව සඳහන් කළේය. රටේ නායකයන් කවුරුන් පත් කළද, මෙවැනි බලගතු පුද්ගලයන් තිරය පිටුපස සිට බොහෝ දේ සිදු කරන බව ඔහු වැඩිදුරටත් කියා සිටී.
වර්තමාන ජාතික ජන බලවේග රජයේ අමාත්යවරුන් කිහිප දෙනෙකු දැඩි ලෙස විවේචනය කළ මන්ත්රීවරයා, ඔවුන්ගේ හැසිරීම් සහ ක්රියාකලාපයන් සම්බන්ධයෙන් සෘජු ප්රහාරයක් එල්ල කළේය. අධිකරණ අමාත්යවරයාගේ ක්රියාකලාපය අමෙරිකානු මල්ලවපොර ක්රීඩකයෙකුට සමාන කරන අතරතුර, රාජ්ය පරිපාලන අමාත්යවරයා සහ ක්රීඩා අමාත්යවරයා සම්බන්ධයෙන්ද ඔහු විවිධ උපමා භාවිතා කරමින් විවේචන එල්ල කළේය. තවද, ආණ්ඩුවේ ඇතැම් අමාත්යවරුන්ගේ දේපළ අත්පත් කර ගැනීම් සහ ව්යාපාරික කටයුතු සම්බන්ධයෙන්ද ඔහු සැක මතු කළේය.
ජාතික ජන බලවේග රජය මේ වන විට දිරාපත් වූ මළ සිරුරකට සමාන බවත්, එම රජය බලයෙන් ඉවත් කිරීමට කාලය පැමිණ ඇති බවත් හෙතෙම අවධාරණය කළේය. මීට අමතරව, ඩිජිටල් ජාතික හැඳුනුම්පත් ව්යාපෘතිය සඳහා ඉන්දීය සමාගමකට කොන්ත්රාත්තුවක් ලබා දීම හරහා ශ්රී ලාංකිකයන්ගේ ජෛවමිතික දත්ත (Biometrics) විදේශීය ආයතනයක් වෙත යෑමේ අවදානමක් පවතින බවද ඔහු මෙහිදී චෝදනා කළේය. මහින්ද අමරවීර, විජයදාස රාජපක්ෂ සහ නිමල් සිරිපාල ද සිල්වා වැනි පළපුරුදු පුද්ගලයන් ශ්රී ලංකා නිදහස් පක්ෂය තුළ සිටින බව සිහිපත් කළ දසනායක මහතා, වත්මන් රජයට හිටපු ජනාධිපති ගෝඨාභය රාජපක්ෂට අත්වූ ඉරණමට වඩා දරුණු ඉරණමකට මුහුණ දීමට සිදුවනු ඇතැයි කියා සිටියේය.
