රජය විසින් ලබාදෙන අස්වැසුම සුබසාධන ප්රතිලාභ ඉදිරියේදී දිගින් දිගටම ලබාදීම වෙනුවට, එම පවුල් ස්වාධීනව නැගී සිටුවීමේ දැවැන්ත මෙහෙයුමක් ආරම්භ කර ඇති බව සමෘද්ධි සංවර්ධන දෙපාර්තමේන්තුව අනාවරණය කරයි. ලෝක බැංකුව සහ ආසියානු සංවර්ධන බැංකුවේ සෘජු මැදිහත්වීම මත 2023 වසරේ සිට ක්රියාත්මක වන මෙම නියමු ව්යාපෘති මඟින් ප්රතිලාභීන් දහස් ගණනකගේ අනාගතය තීරණාත්මක හැරවුම් ලක්ෂ්යයකට රැගෙන ඒමට සූදානම් කර තිබේ. සහනාධාර මතම යැපෙන සංස්කෘතිය වෙනස් කරමින්, තෝරාගත් පවුල් ආර්ථිකමය වශයෙන් සවිබල ගැන්වීම හරහා සහනාධාර ලබාදීම ක්රමයෙන් නතර කිරීම මෙම වැඩපිළිවෙළේ මූලිකම සහ තීරණාත්මක ඉලක්කය වී ඇත.
සමෘද්ධි සංවර්ධන දෙපාර්තමේන්තුවේ අධ්යක්ෂ ජනරාල් ධම්මික මුතුගල මහතා පෙන්වා දෙන්නේ ලෝක බැංකුව යටතේ දිස්ත්රික්ක 12ක පවුල් 10,975ක් ද, ආසියානු සංවර්ධන බැංකුව යටතේ දිස්ත්රික්ක 13ක තවත් පවුල් 10,300ක් ද මේ වන විටත් මෙම සවිබල ගැන්වීමේ ක්රියාවලියට අනුගත කර ඇති බවයි. ආසියානු සංවර්ධන බැංකුවේ ව්යාපෘතිවලින් 85%ක් සහ ලෝක බැංකු ව්යාපෘතිවලින් 40%ක් මේ වන විට සාර්ථකව අවසන් කර ඇති අතර, මෙයට අමතරව සමාජ ආරක්ෂණ අරමුදලේ සහ මහා භාණ්ඩාගාරයේ මුදල් යොදා ගනිමින් තවත් විශාල පිරිසක් සවිබල ගැන්වීමට පියවර ගෙන තිබේ. මෙමඟින් අස්වැසුම ප්රතිලාභීන්ට තමන්ගේම ස්වයං රැකියාවක් හෝ ආදායම් මාර්ගයක් ගොඩනගා ගැනීමට අවශ්ය මඟපෙන්වීම සහ ශක්තිය ලබා දීමට කටයුතු කෙරේ.
මෙම ක්රියාවලියේ අවසන් ප්රතිඵලය වන්නේ අත්යාවශ්යම කරුණු මත පදනම්ව පමණක් අස්වැසුම මුදල් බෙදාහැරීම සිදු කිරීම වන අතර, ස්වාධීනව ආර්ථිකය ශක්තිමත් කරගත හැකි ජනතාවට සහනාධාර ලබාදීම සම්පූර්ණයෙන්ම නතර කර දැමීමයි. රජය පවසන්නේ සහනාධාර ලැයිස්තුවෙන් ඉවත් වී ස්වකීය ශක්තියෙන් නැගී සිටින ජනතාවක් නිර්මාණය කිරීම රටේ අනාගත ආර්ථික ස්ථාවරත්වයට අත්යාවශ්ය සාධකයක් වන බවයි. එම නිසා අස්වැසුම ලබන පවුල්වලට මෙය තවදුරටත් රජයේ මුදල් මතම යැපෙනවාද නැතහොත් ලැබෙන අවස්ථාවෙන් ප්රයෝජන ගෙන ස්වාධීන වෙනවාද යන්න තීරණය කිරීමට ලැබුණු ප්රබල පණිවුඩයකි.
