ශ්රී ලංකාවේ යෝජිත රුපියල් බිලියන 40ක ඩිජිටල් හැඳුනුම්පත් ව්යාපෘතියේ ටෙන්ඩරය කළු ලැයිස්තුගත ඉන්දියානු සමාගමකට ලබා දීමට සූදානම් වන බවට ජාතික වෘත්තීය සමිති සහ සිවිල් පෙරමුණේ කැඳවුම්කරු විශේෂඥ වෛද්ය චමල් සංජීව මහතා බරපතළ හෙළිදරව්වක් සිදු කරයි. කොළඹදී පැවති මාධ්ය හමුවකට එක්වෙමින් ඔහු අවධාරණය කළේ, මෙම ගනුදෙනුව සම්බන්ධයෙන් රජය වහාම රටට පැහැදිලි කිරීමක් ලබා දිය යුතු බවයි.
ඇඟිලි සලකුණු සහ අයිරිස් (Iris) දත්ත ඇතුළු ශ්රී ලාංකික ජනතාවගේ අතිශය සංවේදී ජෛවමිතික තොරතුරු විදේශීය සමාගමකට මෙලෙස භාරදීම ජාතික ආරක්ෂාවට මෙන්ම පුද්ගලික දත්ත රහස්යභාවයට බරපතළ තර්ජනයක් විය හැකි බව ඔහු පෙන්වා දෙයි. විශේෂයෙන්ම අදාළ සමාගම මීට පෙර ගැටලුකාරී වාර්තා සහිත කළු ලැයිස්තුගත ආයතනයක් බවට තොරතුරු පවතින පසුබිමක, මෙවැනි තීරණයක් ගැනීම පිටුපස ඇති විනිවිදභාවය පිළිබඳව ඔහු ප්රශ්න කර සිටියි. දේශීය දත්ත පද්ධතියක ආරක්ෂාව විදේශීය පාලනයකට නතු කිරීමේ අවදානම පිළිබඳව සිවිල් සංවිධාන මේ වන විට සිය දැඩි අවධානය යොමු කර තිබේ.
