ඉදිකිරීම් ක්ෂේත්රයේ දැවැන්ත පෙරළියක් කරමින් ඉවතලන කොන්ක්රීට් සහ ඉදිකිරීම් අපද්රව්ය ප්රතිචක්රීකරණය කර නැවත භාවිතයට ගත හැකි මෙරට පළමු ව්යාපෘතිය ජාඇළ ඒකල කාර්මික ජනපද පරිශ්රයේදී නිල වශයෙන් ආරම්භ විය. නිවාස ඉදිකිරීම් සහ ජලජ සම්පත් අමාත්ය වෛද්ය සුසිල් රණසිංහ මහතාගේ ප්රධානත්වයෙන් විවෘත වූ මෙම මධ්යස්ථානය හරහා මෙතෙක් පරිසරයට මුදාහළ ඉදිකිරීම් අපද්රව්යවලින් 95%ක්ම ගල්, වැලි සහ චිප්ස් ලෙස නැවත ප්රයෝජනයට ගැනීමට අවස්ථාව උදා වේ. වසර 18ක පමණ කාලයක් කිසිදු ප්රයෝජනයකට නොගෙන දිරාපත් වීමට ඉඩ හැර තිබූ යන්ත්ර සූත්ර රජයේ මැදිහත් වීමෙන් අලුත්වැඩියා කර මෙලෙස ජනතා අයිතියට පත් කිරීම සුවිශේෂී කරුණකි.
විශේෂයෙන්ම බස්නාහිර පළාතේ දිනකට බැහැර කෙරෙන ටොන් 300ක් පමණ වූ කොන්ක්රීට් අපද්රව්ය කළමනාකරණය කිරීමට මෙමඟින් ස්ථිර විසඳුමක් ලැබෙනු ඇත. ගංගා වැලි භාවිතය සීමා වී ඇති මෙවන් වකවානුවක ඉදිකිරීම් කර්මාන්තය සඳහා අවශ්ය ‘මැනුෆැක්චර් සෑන්ඩ්’ (Manufactured Sand) ලබා ගැනීමට මෙම ව්යාපෘතිය සාර්ථක විකල්පයක් වන බව අමාත්යවරයා පෙන්වා දුන්නේය. මේ සඳහා අවශ්ය නීතිමය ප්රතිපාදන පවා මේ වන විට සකස් කර ඇති අතර රජයේ ඉදිකිරීම් සඳහා මෙම ප්රතිචක්රීකරණය කළ අමුද්රව්ය භාවිත කිරීමට ඉදිරියේදී ප්රමුඛතාව හිමි වනු ඇත.
‘ක්ලීන් ශ්රී ලංකා’ (Clean Sri Lanka) වැඩසටහන යටතේ රුපියල් මිලියන 200ක ආයෝජනයකින් ඇරඹි මෙම ව්යාපෘතිය මඟින් ඉදිකිරීම් පිරිවැය සැලකිය යුතු ලෙස අඩු කර ගැනීමට මෙන්ම ස්වාභාවික සම්පත් ක්ෂය වීම වැළැක්වීමට ද හැකි වේ. පැයකට මෙට්රික් ටොන් 200ක ධාරිතාවකින් යුත් මෙම යන්ත්රාගාරය සමඟ නවීන විද්යාගාරයක් ද ස්ථාපිත කර ඇති අතර ඉදිකිරීම් ක්ෂේත්රයේ චක්රීය ආර්ථිකයක් ගොඩනැඟීම මෙහි මූලික අරමුණයි. මෙම ඓතිහාසික පියවර හරහා පරිසර දූෂණය අවම වනවා සේම මෙරට ඉදිකිරීම් ක්ෂේත්රයේ නව මාවතක් විවර වනු ඇතැයි රජය අපේක්ෂා කරයි.
