පේරාදෙණිය විශ්වවිද්යාලයේ දන්ත වෛද්ය පීඨයේ මහාචාර්ය ඩබ්ලිව්. එම්. තිලකරත්න නැමැත්තා විසින් සිය සහකාර ආචාර්යවරියක වෙත එල්ල කරන ලද ලිංගික හා මානසික පීඩාවන් සම්බන්ධයෙන් ශ්රේෂ්ඨාධිකරණය ලබාදුන් තීන්දුව මෙරට අධ්යාපන පද්ධතිය තුළ කාන්තාවන්ගේ සුරක්ෂිතතාව තහවුරු කරන සන්ධිස්ථානයක් බවට පත්ව තිබේ. අදාළ මහාචාර්යවරයා ලිංගික හිරිහැර කිරීම් සම්බන්ධ චෝදනා රැසකට වැරදිකරු බව විධිමත් පරීක්ෂණ මණ්ඩලයක් විසින් නිගමනය කර තිබියදීත්, පැමිණිල්ල ඉදිරිපත් කිරීමට ගතවූ කාලය පදනම් කරගනිමින් විශ්වවිද්යාල සභාව ඔහුව නිදහස් කිරීමට මීට පෙර තීරණය කර තිබුණි. මෙම පරිපාලනමය තීන්දුව අභියෝගයට ලක් කරමින් වින්දිත වෛද්යවරිය විසින් ගොනුකළ මූලික අයිතිවාසිකම් පෙත්සම විභාග කළ අධිකරණය, වගඋත්තරකරුට එරෙහිව පැනවූ දඬුවම් නීත්යානුකූල බවත් විශ්වවිද්යාල සභාවේ තීරණය අත්තනෝමතික බවත් තීන්දු කළේය.
මෙම නඩු තීන්දුව මඟින් වඩාත් වැදගත් වන්නේ ලිංගික හිරිහැරයකට ලක්වූ කාන්තාවක නීතිය හමුවට පැමිණීමේදී මුහුණ දෙන මානසික සහ සමාජීය බාධා හඳුනාගැනීම සඳහා අධිකරණය දැක්වූ සංවේදී ප්රවේශයයි. යම් හිරිහැරයක් සිදු වූ වහාම එය වාර්තා නොකිරීම, එම අපරාධයේ බරපතළකම අවතක්සේරු කිරීමට හෝ චූදිතයා නිදහස් කිරීමට හේතුවක් නොවිය යුතු බව විනිසුරු මඩුල්ල අවධාරණය කළහ. බලතල සහ තනතුරු මඟින් ඇති කරන පීඩනය හමුවේ අසරණ වන වින්දිතයන්ට සිය අයිතිවාසිකම් වෙනුවෙන් පෙනී සිටීමට ඇති අයිතිය නීතියෙන් තහවුරු කළ යුතු බවත්, ආයතනික මට්ටමින් එවැනි පැමිණිලි විභාග කිරීමේදී තාක්ෂණික දෝෂවලට වඩා මානුෂීය යුක්තියට මුල් තැන දිය යුතු බවත් මෙමඟින් පෙන්වා දී ඇත.
අධිකරණ නියෝගයට අනුව, වගඋත්තරකාර මහාචාර්යවරයාට මින් ඉදිරියට කිසිදු විශ්වවිද්යාලයක හෝ රජයේ අධ්යයන ආයතනයක කිසිදු තනතුරක් දැරීම ජීවිතාන්තය දක්වා තහනම් කර ඇත. මීට අමතරව, විශ්වවිද්යාල පරිශ්රයන් තුළ මෙවැනි සිදුවීම් වැළැක්වීම සඳහා වන “ලිංගික හා ස්ත්රී පුරුෂ සමාජභාවය මත පදනම් වූ හිරිහැර වැළැක්වීමේ ප්රතිපත්තිය” පිළිබඳව වාර්ෂිකව සියලුම සේවකයන් සහ සිසුන් දැනුවත් කිරීමේ සම්මන්ත්රණ පවත්වන ලෙසද අධිකරණය පේරාදෙණිය විශ්වවිද්යාලයට සහ ප්රතිපාදන කොමිෂන් සභාවට නියම කළේය. මෙම නියෝගය මඟින් උසස් අධ්යාපන ක්ෂේත්රය තුළ ගෞරවනීය සේවා පරිසරයක් නිර්මාණය කිරීමට අවශ්ය නීතිමය පදනම සැකසෙන අතර, වැරදිකරුවන්ට තනතුරු හෝ බලය රැකවරණයක් නොවන බවට ප්රබල පණිවිඩයක් නිකුත් කරයි.
