බංග්ලාදේශයේ මේ වන විට සීඝ්රයෙන් පැතිර යන සරම්ප රෝග ව්යාප්තිය හමුවේ රෝගීන් මියයාම පිළිබඳ නිකුත් කෙරෙන නිල සංඛ්යාලේඛන සහ ප්රාදේශීය දත්ත අතර බරපතළ පරස්පරතා පවතින බව විදෙස් මාධ්ය වාර්තා කරයි. සෞඛ්ය සේවා අධ්යක්ෂ ජනරාල් කාර්යාලයේ මධ්යම දත්ත පද්ධතියේ සඳහන් වනවාට වඩා අවම වශයෙන් තවත් සැකකටයුතු මරණ 34ක් ප්රාදේශීය කාර්යාල දත්තවල ඇතුළත් වී ඇති බව ‘ද ඩේලි ස්ටාර්’ (The Daily Star) පුවත්පත පෙන්වා දෙයි. විශේෂයෙන්ම මයිමන්සිං (Mymensingh) ප්රාන්තයේ කිසිදු මරණයක් මධ්යම දත්තවල වාර්තා වී නොමැති වුවද එහි වෛද්ය විද්යාල රෝහලේදී පමණක් පසුගිය සතියේ සැකකටයුතු මරණ 25ක් සිදුව ඇති බව එම රෝහල් බලධාරීන් තහවුරු කර තිබේ.
බරිෂාල් (Barishal) ප්රාන්තයෙන් ද මෙලෙසම පරස්පර දත්ත වාර්තා වන අතර මධ්යම දත්ත පද්ධතියට ප්රාදේශීය මට්ටමින් නිසි පරිදි තොරතුරු යොමු නොවීම හෝ දත්ත ප්රමාද වීම මෙයට හේතුවී ඇති බව විශ්වාස කෙරේ. සරම්ප රෝගය ආසාදනය වීමෙන් පසු සිදුවන මරණ සැබෑ සංඛ්යාවට වඩා අඩුවෙන් ලේඛනගත වී ඇති බවට සෞඛ්ය විශේෂඥයන් අනතුරු අඟවන අතර වර්තමාන තත්ත්වය හමුවේ රෝග ව්යාප්තිය පාලනය කිරීම සඳහා නිවැරදි දත්ත කළමනාකරණයක අවශ්යතාව විදෙස් මාධ්ය අවධාරණය කර සිටියි.
