ශ්රී ලංකාවේ හෘද රෝග ප්රතිකාර ක්ෂේත්රය ශක්තිමත් කරමින් දිවයිනේ ප්රධාන රෝහල් රැසකට අති නවීන හෘද කැතීටකරණ යන්ත්ර (Cath Lab) 16ක් අලුතින් ස්ථාපිත කිරීමට සෞඛ්ය හා ජනමාධ්ය අමාත්යාංශය පියවර ගෙන තිබේ. රුපියල් මිලියන 3103ක වියදමකින් ක්රියාත්මක වන මෙම ව්යාපෘතිය සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ උපදෙස් පරිදි 2026 වර්ෂය තුළ නිම කිරීමට නියමිතය.
මෙම ව්යාපෘතිය සඳහා මූල්ය ප්රතිපාදන සපයා ගනු ලබන ආකාරය අනුව, සෞඛ්ය හා ජනමාධ්ය අමාත්යාංශය රුපියල් මිලියන 715ක ප්රතිපාදන යටතේ මඩකළපුව, රත්නපුර, බදුල්ල ශික්ෂණ රෝහල් සහ ගාල්ල ජාතික රෝහල සඳහා යන්ත්ර 04ක් ලබා දී ඇත. ආසියානු සංවර්ධන බැංකුවේ (ADB) රුපියල් මිලියන 1188ක ප්රතිපාදන යටතේ කොළඹ ජාතික රෝහලට යන්ත්ර 03ක් ද, මහනුවර ජාතික රෝහල, යාපනය සහ කළුබෝවිල ශික්ෂණ රෝහල් සඳහා තවත් යන්ත්ර 03ක් ද ලබා දී තිබේ. මීට අමතරව ජයිකා (JICA) ආධාර රුපියල් මිලියන 1200ක ප්රතිපාදන යටතේ අනුරාධපුර ශික්ෂණ රෝහලට යන්ත්ර 02ක් ද, කුරුණෑගල, බදුල්ල ශික්ෂණ රෝහල්, මහනුවර ජාතික රෝහල සහ ත්රිකුණාමලය දිස්ත්රික් මහ රෝහල සඳහා තවත් යන්ත්ර 04ක් ද ලබා දීමට නියමිතය.
දැනට රජයේ රෝහල් පද්ධතියේ සක්රීයව පවතින්නේ හෘද කැතීටකරණ යන්ත්ර 10ක් පමණක් වන අතර, මෙම නව යන්ත්ර 16 ස්ථාපිත කිරීමත් සමඟ මුළු යන්ත්ර සංඛ්යාව 26 දක්වා ඉහළ යනු ඇත. මෙම ව්යාපෘතිය මගින් හෘද රෝගීන්ගේ පොරොත්තු ලේඛන අවම කිරීම, හෘදයාබාධ රෝගීන් සඳහා පැය 24 පුරා අඛණ්ඩ සේවාවක් සහතික කිරීම සහ වාර්ෂික හෘද රෝග ප්රතිකාර ධාරිතාව දෙගුණයකට වඩා වැඩි කරමින් මරණ සංඛ්යාව අවම කිරීම අපේක්ෂා කෙරේ.
