දිට්වා සුළි කුණාටුව හේතුවෙන් පීඩාවට පත් බදුල්ල දිස්ත්රික්කයේ ජන ජීවිතය යථා තත්ත්වයට පත් කිරීමේ ප්රගතිය සමාලෝචනය කිරීම සඳහා විශේෂ දිස්ත්රික් සම්බන්ධීකරණ කමිටු රැස්වීමක් අද (13) පස්වරුවේ පැවැත්විණි. බදුල්ල දිස්ත්රික් ලේකම් කාර්යාලයේදී ජනාධිපති අනුර කුමාර දිසානායක මහතාගේ ප්රධානත්වයෙන් පැවැති මෙම රැස්වීමේදී, ආපදා තත්ත්වයෙන් පීඩාවට පත් ජනතාව වෙනුවෙන් තීන්දු තීරණ රැසක් ප්රකාශයට පත් කෙරිණි.
නැවත පදිංචි කිරීම් සහ ඉඩම් ලබාදීම
ආපදා තත්ත්වය හේතුවෙන් බදුල්ල දිස්ත්රික්කයේ පවුල් 26,517කට අයත් පුද්ගලයන් 90,667ක් පීඩාවට පත්ව ඇති අතර, පූර්ණ හානි වූ සහ අධි අවදානම් සහිත නිවාස හේතුවෙන් පවුල් 3,434ක් නැවත පදිංචි කළ යුතුව තිබේ. මේ සඳහා දැනට පෞද්ගලික සමාගම් සතු රජයේ ඉඩම් කඩිනමින් නිදහස් කරගෙන ජනතාව පදිංචි කිරීමේ කටයුතු අරඹන ලෙස ජනාධිපතිවරයා උපදෙස් දුන්නේය. වෙනත් ස්ථානයක පදිංචි වීම පිළිබඳ දෙගිඩියාවෙන් පසුවන ජනතාවට ඒ පිළිබඳ අවසන් තීරණයක් ගැනීම සඳහා ජුනි 15 දක්වා සහන කාලයක් ලබා දීමට ද මෙහිදී තීරණය විය.
වන්දි සහ ජීවනෝපාය සංවර්ධනය
මියගිය පුද්ගලයන් වෙනුවෙන් වන්දි, නිවාස කුලී මෙන්ම ජීවනෝපාය අහිමි වූ සුළු හා මධ්ය පරිමාණ ව්යාපාරිකයන්ට වන්දි ගෙවීමේ ප්රගතිය පිළිබඳව ජනාධිපතිවරයා මෙහිදී කරුණු විමසීය. විශේෂයෙන් වගා බිම්වල තැන්පත් වී ඇති වැලි සහ ගල් ඉවත් කිරීම සඳහා අක්කරයකට රුපියල් 25,000ක දීමනාවක් ලබා දීමටත්, ඒ සඳහා ගොවි සංවිධානවල දායකත්වය ලබා ගැනීමටත් තීරණය කර ඇත.
යටිතල පහසුකම් කඩිනම් කිරීම
මාර්ග සංවර්ධන අධිකාරියට අයත් හානි වූ මාර්ග 21හි වැඩකටයුතු මේ වසර තුළ අවසන් කරන ලෙස නිලධාරීන්ට නියෝග කළ ජනාධිපතිවරයා, ජන ජීවිතය යථා තත්ත්වයට පත් කිරීමේදී මුදල් බාධාවක් කර නොගන්නා ලෙස ද අවධාරණය කළේය. පීඩාවට පත් ජනතාව මේ වසර තුළ සාමාන්ය තත්ත්වයට පත් කර, ලබන වසරේ සිට දිස්ත්රික් සංවර්ධන සැලසුම් යළි ආරම්භ කිරීම රජයේ අරමුණ බව ද ඔහු වැඩිදුරටත් ප්රකාශ කළේය.
