රත්මලාන ගුවන්තොටුපොළ මාර්ගයේදී ත්රීරෝද රථයකින් ගමන් කරමින් සිටි පුද්ගලයෙකුට පහරදී, ඔහු සන්තකයේ තිබූ රුපියල් 380,000ක මුදලක් කොල්ලකෑ බව කියන ගල්කිස්ස මූලස්ථාන පොලීසියේ විවිධ පැමිණිලි අංශයට අනුයුක්තව සේවය කරන පොලිස් කොස්තාපල්වරුන් දෙදෙනෙකු ගල්කිස්ස කොට්ඨාස අපරාධ විමර්ශන කාර්යාංශය මඟින් අත්අඩංගුවට ගෙන තිබේ.
ඉකුත් 15 වන දින මොරටුව, අඟුලාන සයුරුපුර මහල් නිවාස සංකීර්ණයේ පදිංචි ත්රීරෝද රථ රියදුරෙකු විසින් කරන ලද පැමිණිල්ලකට අනුව මෙම සැකකාර කොස්තාපල්වරුන් දෙදෙනා අත්අඩංගුවට ගෙන ඇත. යතුරුපැදියකින් පැමිණි නාඳුනන පුද්ගලයන් දෙදෙනෙකු තම මඟ හරස් කර, තමන්ට පහර දී මෙම මුදල කොල්ලකෑ බවට රියදුරා පැමිණිලි කර තිබුණි.
පැමිණිලිකාර රියදුරා එම මුදල් සීට්ටු මුදල් බව ප්රකාශ කළ ද, ඒ පිළිබඳව ඇතිවූ සැකය මත පොලීසිය සිදුකළ දීර්ඝ විමර්ශනවලදී තිගැස්සෙන තොරතුරු රැසක් අනාවරණය විය. ඒ අනුව, අදාළ මුදල් විදේශගතව සිට මහා පරිමාණ මත්ද්රව්ය ජාවාරමේ යෙදෙන රත්මලානේ “කූඩු අංජු” නමැත්තාට අයත් මත්ද්රව්ය සල්ලි බවත්, රියදුරා විසින් ඒවා ප්රවාහනය කරමින් සිටියදී මෙම කොල්ලකෑම සිදුව ඇති බවත් පොලීසිය පවසයි. මේ අතර, ත්රීරෝද රථ රියදුරාට මෙම මුදල් ලබාදුන් බව කියන මොරටුව, අඟුලාන සමුද්රාසන්න මාවතේ පදිංචි 55 හැවිරිදි කාන්තාවකගෙන් ද පොලීසිය ප්රශ්න කර තිබේ. ඇය ද එය සීට්ටු මුදලක් බව පැවසුව ද එය තහවුරු කිරීමට අපොහොසත් වී ඇත. පසුව සිදුකළ විමර්ශනවලදී ඇය රත්මලාන කූඩු අංජුගේ මත්ද්රව්ය ජාවාරමේ නිරත වන, මීට පෙර ද පොලිස් අත්අඩංගුවට පත්වූ තැනැත්තියක බව තහවුරු වීමත් සමඟ පොලීසිය ඇයව ද අත්අඩංගුවට ගෙන තිබේ. අත්අඩංගුවට ගත් පොලිස් කොස්තාපල්වරුන් ඇතුළු සියලුම සැකකරුවන් ගල්කිස්ස මහෙස්ත්රාත් අධිකරණය වෙත ඉදිරිපත් කිරීමට නියමිතය.
