වසර එකහමාරක පමණ කාලයක් තිස්සේ රටේ ආර්ථිකය වර්ධනය නොවන නිසා මුළු රටම මේ වන විට නටන වතුර බඳුනක සිටින කකුළුවෙකුගේ තත්ත්වයට පත්ව ඇතැයි සර්වජන බලය නායක, පාර්ලිමේන්තු මන්ත්රී දිලිත් ජයවීර මහතා පවසයි. සර්වජන බලය පක්ෂ මූලස්ථානයේ පැවැති මාධ්ය හමුවක් අමතමින් ඔහු මේ බව කියා සිටියේය.
රජය සතුව පැහැදිලි ආනයන අපනයන දැක්මක් නොමැති වීම හේතුවෙන් ඩොලරයේ අගය වේගයෙන් ඉහළ යමින් පවතින බවත්, මේ නිසා දැනටමත් රට තුළ උග්ර ආර්ථික අර්බුදයක් නිර්මාණය වී ඇති බවත් ඔහු පෙන්වා දුන්නේය. ආණ්ඩුව සිය ප්රාථමික ගිණුමේ විශාල මුදලක් ශේෂවී ඇතැයි උදම් ඇනුවද, බොහෝ දියුණු සහ දියුණුවන රටවල් තම ආර්ථිකයේ ද්රවශීලතාව (Liquidity) වැඩිකර ගැනීම සඳහා ප්රාථමික ගිණුම සෘණ මට්ටමේ පවත්වාගෙන යන බව ඔහු ප්රකාශ කළේය. ආණ්ඩුව වෙළඳපොළේ ඇති මුදල් ලබාගෙන ගිණුමකට දමාගැනීම නිසා රටේ මුදල් සංසරණය, ආයෝජන සහ නව මුදල් උත්පාදනය මුළුමනින්ම අඩාල වී ඇති බවත්, මේ හේතුවෙන් ආර්ථිකය හැකිළී ජනතාවගේ අතේ මුදල් නොමැති තත්ත්වයක් උදාවී ඇති බවත් දිලිත් ජයවීර මහතා වැඩිදුරටත් අවධාරණය කළේය.
