ශ්රී ලංකාව තුළ මේ වන විට තැලසීමියා රෝගීන් 2,500ක් පමණ වාර්තා වී ඇති අතර, වාර්ෂිකව තවත් දරුවන් 45ත් 60ත් අතර ප්රමාණයක් “මහා තැලසීමියා” (Thalassemia Major) රෝගී තත්ත්වය සමඟ උපදින බව සෞඛ්ය අමාත්යාංශයේ බෝ නොවන රෝග ඒකකයේ අධ්යක්ෂ, වෛද්ය ශ්රීනි අලහප්පෙරුම මහතා අනාවරණය කරයි. මැයි 08 වනදාට යෙදී තිබුණු ජාත්යන්තර තැලසීමියා රෝග දිනය නිමිත්තෙන් පැවැති මාධ්ය හමුවකට එක්වෙමින් ඔහු මේ බව සඳහන් කළේය.
මෙම සංඛ්යාව අනෙකුත් රෝග හා සසඳන විට සුළු ප්රමාණයක් ලෙස පෙනුනද, වසරින් වසර මෙම අගය ක්රමානුකූලව ඉහළ යාමේ දැඩි අවදානමක් පවතින බව වෛද්යවරයා පෙන්වා දෙයි. දැනට පවතින තත්ත්වය අනුව ඉදිරි වසර 10 තුළ මෙම උපත් සංඛ්යාව 100 දක්වා ඉහළ යා හැකි බැවින්, රෝගය තුරන් කිරීම සඳහා ඇති එකම සහ ප්රධානතම විසඳුම “තැලසීමියා වාහකයන්” (Thalassemia Carriers) දෙදෙනෙකු අතර සිදුවන විවාහයන් අවම කිරීම බව ඔහු අවධාරණය කළේය. මේ සඳහා විශේෂ නීති නොමැති බැවින් ජනතාව දැනුවත් කිරීම අත්යවශ්ය වී තිබේ. දැනට කුරුණෑගල, අනුරාධපුර, රාගම සහ මඩකලපුව ඇතුළු තැලසීමියා රෝගය බහුලවම වාර්තා වන දිස්ත්රික්ක 6ක විශේෂ පාසල් දරුවන් වර්ගීකරණ (Screening) වැඩසටහන් සහ ප්රතිකාර මධ්යස්ථාන ක්රියාත්මක වේ. එහිදී වාහකයන් ලෙස හඳුනාගන්නා අයට විශේෂ කාඩ්පතක් නිකුත් කෙරේ. සාමාන්ය Full Blood Count (FBC) පරීක්ෂණයක් මඟින් පවා මේ පිළිබඳ සැකසහිත තත්ත්වයන් රජයේ රෝහල්වලදී නොමිලේ හඳුනාගත හැකි බැවින්, සාම්ප්රදායික පොරොන්දම් ගැලපීමට පෙර විවාහ අපේක්ෂිතයින් අනිවාර්යයෙන්ම තැලසීමියා පරීක්ෂණය සිදුකරගත යුතු බව සෞඛ්ය අංශ උපදෙස් දෙයි.
