රට තුළ කියවීමේ සංස්කෘතිය වියැකී යමින් තිබෙන අවධියක තවමත් දමිළ ජනතාව කියවීම කෙරෙහි දක්වන උනන්දුව අගය කළ යුතු බව ජනාධිපති අනුර කුමාර දිසානායක මහතා ප්රකාශ කළේය. ජනාධිපතිවරයා මේ බව කියා සිටියේ මඩකළපුව මහනගර සභාවට අයත් මහජන පුස්තකාල නව ගොඩනැගිල්ල අද (20) පෙරවරුවේ ජනතා අයිතියට පත්කිරීමේ විශේෂ උත්සවයට එක්වෙමිනි.
මෙම නව පුස්තකාල ගොඩනැගිල්ල ජනාධිපති අනුර කුමාර දිසානායක මහතාගේ ප්රධානත්වයෙන් සහ හිටපු පාර්ලිමේන්තු මන්ත්රී එම්.ඒ. සුමන්තිරන් මහතා අතින් නිල වශයෙන් විවෘත කෙරිණි. එහිදී අදහස් දැක්වූ ජනාධිපතිවරයා, අතරමඟ නතර වී තිබූ මෙම පුස්තකාලයේ ඉදිකිරීම් කටයුතු සාර්ථකව අවසන් කර ජනතා අයිතියට පත්කිරීමට ලැබීම පිළිබඳව සිය සතුට පළ කළේය. පුස්තකාලයක් විවෘත කිරීම යනු බන්ධනාගාරයක අවශ්යතාව නැති කරන්නක් බව පෙන්වා දුන් ඒ මහතා, මෙමඟින් දමිළ ජනතාවගේ පොත් කියවීමේ සංස්කෘතිය තවදුරටත් ඉදිරියට පවත්වාගෙන යාම දිරිමත් කෙරෙනු ඇතැයි ද විශ්වාසය පළ කළේය.
මෙම උත්සවයට සමගාමීව මඩකළපුව මහජන පුස්තකාලයේ නිල වෙබ් අඩවිය දියත් කිරීම ද ජනාධිපතිවරයා අතින් සිදුවූ අතර, ළමුන් වෙනුවෙන් විද්යා හා තාක්ෂණික දැනුම ලබාදීම සඳහා පුස්තකාලය තුළ ස්ථාපිත කර ඇති විශේෂ ඒකකය ද විවෘත විය. අනතුරුව පුස්තකාල පරිශ්රයේ නිරීක්ෂණ චාරිකාවක යෙදෙමින් මහනගර සභා කාර්ය මණ්ඩලය සමඟ සුහද කතාබහක නිරත වූ ජනාධිපතිවරයා වෙත, මඩකළපුව නගරාධිපති කේ. සිවම් පාක්කියනාදන් මහතා විසින් සමරු සිහිවටනයක් ද පිරිනමන ලදී. මෙම ඓතිහාසික අවස්ථාව සනිටුහන් කරමින් ජනාධිපතිවරයා විසින් පුස්තකාල භූමියේ සමරු පැළයක් ද රෝපණය කරනු ලැබීය.
