අම්පාර දිස්ත්රික්කයේ ජනතාව වෙනුවෙන් ක්රියාත්මක සංවර්ධන ව්යාපෘතිවල මෙන්ම “දිට්වා” සුළි කුණාටුවෙන් පීඩාවට පත් ජනතාවට සහන සැලසීමේ වැඩසටහන්වල ප්රගතිය විමසා බැලීම සඳහා වන විශේෂ සම්බන්ධීකරණ කමිටු රැස්වීම අද (22) පස්වරුවේ ජනාධිපති අනුර කුමාර දිසානායක මහතාගේ ප්රධානත්වයෙන් පැවැත්වීමට නියමිතය. අම්පාර දිස්ත්රික් ලේකම් කාර්යාලයීය ශ්රවණාගාරයේදී මෙම රැස්වීම පැවැත්වීමට සියලු කටයුතු සූදානම් කර තිබේ.
මේ අතර වසර ගණනාවකට පෙර ඉදිකිරීම් ආරම්භ කර අතරමඟ නැවතී තිබූ නින්දවුර් සංස්කෘතික මධ්යස්ථානයේ ඉදිකිරීම් කටයුතු යළි ආරම්භ කිරීම ද අද පෙරවරුවේ ජනාධිපතිවරයාගේ ප්රධානත්වයෙන් සිදු කෙරේ. අම්පාර දිස්ත්රික්කයේ සංස්කෘතික උරුමයන් මතු පරපුරට දායාද කිරීමේ අරමුණින් ක්රියාත්මක මෙම ව්යාපෘතිය සඳහා 2026 වසර වෙනුවෙන් රුපියල් මිලියන 300ක අයවැය ප්රතිපාදන වෙන් කර ඇත. සමස්ත ඇස්තමේන්තුගත පිරිවැය රුපියල් මිලියන 945.04ක් වන මෙම සංස්කෘතික මධ්යස්ථානයේ ඉදිකිරීම් 2027 දෙසැම්බර් 31 වැනිදා වන විට අවසන් කිරීමට සැලසුම් කර තිබේ.
මීට අමතරව අම්පාර නගරයේ දීර්ඝකාලීන අඩුපාඩුවක් සපුරාලමින් ඉදිවන “අම්පාර බහුකාර්ය නගර ශාලාවේ” ඉදිකිරීම් කටයුතු ආරම්භ කිරීම ද අද පෙරවරුවේ ජනාධිපතිවරයා අතින් සිදු කෙරේ. රුපියල් මිලියන 1,744.85ක දැවැන්ත වියදමකින් නිමවන මෙම ව්යාපෘතිය 2028 දෙසැම්බර් 31 වැනිදා වන විට ජනතා අයිතියට පත් කිරීමට නියමිතය.
