මැදපෙරදිග කලාපයේ පවතින යුදමය වාතාවරණය හේතුවෙන් ශ්රී ලංකාවේ ආර්ථිකයට දැඩි බලපෑමක් එල්ල වී ඇති බැවින්, මෙම තීරණාත්මක අවස්ථාවේදී රට ගැන සිතා තමන් පරිභෝජනය කරන ආනයනික භාණ්ඩ සීමා කර ආණ්ඩුවට සහාය දක්වන ලෙස ආර්ථික සංවර්ධන නියෝජ්ය අමාත්ය නිශාන්ත ජයවීර මහතා ජනතාවගෙන් හදිසි ඉල්ලීමක් කරයි. ඊයේ (21) පාර්ලිමේන්තුව අමතමින් නියෝජ්ය අමාත්යවරයා මේ බව සඳහන් කළේය.
එහිදී වැඩිදුරටත් අදහස් දැක්වූ නියෝජ්ය අමාත්යවරයා පෙන්වා දුන්නේ පසුගිය 2025 වසරේදී මෙරට ආර්ථිකය 5%ක සාධනීය වර්ධන වේගයක් කරා ස්ථාවර කර ගැනීමට රජයට හැකි වූ බවයි. එමෙන්ම උදාවූ 2026 වසරේදී ආර්ථික වර්ධන වේගය 7%ක් දක්වා ඉහළ නැංවීමට සියලු සැලසුම් සකස් කර තිබූ පසුබිමක, මැදපෙරදිග කලාපයේ හදිසියේ නිර්මාණය වූ යුදමය තත්ත්වය මෙරට බලාපොරොත්තු වූ ආර්ථික ඉලක්ක කරා යාමට දැඩි අභියෝගයක් එල්ල කර ඇති බව ද හෙතෙම සඳහන් කළේය. ගෝලීය අර්බුද හමුවේ විදේශ විනිමය ආරක්ෂා කර ගැනීම වෙනුවෙන් අනවශ්ය වියදම් පාලනය කරමින් සහයෝගය දීම සමස්ත පුරවැසියන්ගේ වගකීමක් බව ද අමාත්යවරයා මෙහිදී අවධාරණය කළේය.
