ලන්ඩන් නුවර කාර්යබහුල වීදිවල ගමන් ගන්නා සංචාරකයන්, සාප්පු සවාරි යන්නන් සහ කාර්යාල සේවකයන් සිය දෛනික කටයුතුවල නිරත වන අතරතුරදීම, ඔවුන් නොදැනුවත්වම පොලිස් නිරීක්ෂණ පද්ධතියක ඩිජිටල් අනන්යතා පරීක්ෂාවකට ලක්වීමේ පුවතක් ජාත්යන්තර මාධ්ය ඔස්සේ වාර්තා වේ. ලන්ඩන් මෙට්රොපොලිටන් පොලිසිය (Metropolitan Police) විසින් වීදි පුරා සවි කර ඇති සජීවී මුහුණු හඳුනාගැනීමේ කැමරා පද්ධති (Live Facial Recognition) මඟින්, මඟීන්ගේ මුහුණු පොලිස් සෝදිසි ලැයිස්තුවේ සිටින සැකකරුවන්ගේ මුහුණු සමඟ ක්ෂණිකව සංසන්දනය කරමින් මෙම මෙහෙයුම් දියත් කරනු ලබයි. බ්රිතාන්ය පොලිසිය පෙන්වා දෙන්නේ මෙම නවීන තාක්ෂණය හේතුවෙන් 2024 වසරේ ආරම්භයේ සිට මේ දක්වා කාලය තුළදී පමණක් ප්රචණ්ඩකාරී සහ ලිංගික අපරාධවලට සම්බන්ධ සැකකරුවන් ඇතුළු අවශ්යම කර සිටි අපරාධකරුවන් 2,500කට ආසන්න පිරිසක් අත්අඩංගුවට ගැනීමට තමන්ට හැකිවූ බවයි.
කෙසේ වෙතත්, මෙම තාක්ෂණය බ්රිතාන්යය තුළ සිවිල් නිදහස සහ ජනතා අයිතිවාසිකම් වෙනුවෙන් පෙනී සිටින සංවිධානවල දැඩි විවේචනයට ලක්ව තිබේ. ඔවුන් චෝදනා කරන්නේ අධිකරණයකින් වරදකරු කිරීමට පෙර ඕනෑම අයෙකු නිර්දෝෂී පුද්ගලයෙකු ලෙස සලකන පොදු නීතිමය උපකල්පනය (Presumption of Innocence) මෙමඟින් බිඳ වැටෙන බවත්, මහජනතාවගේ පෞද්ගලික නිදහස දැඩි ලෙස උල්ලංඝනය වන බවත්ය. මෙම සජීවී මුහුණු හඳුනාගැනීමේ තාක්ෂණයට එරෙහිව අධිකරණය හමුවේ ගොනු කළ අභියෝගාත්මක නඩුවක් ද පසුගිය අප්රේල් මාසයේදී නිෂ්ප්රභ කෙරුණු අතර, ඉන් අනතුරුව මැයි මස 16 වැනිදා මෙරට පැවැති මහජන විරෝධතාවකදී ද ප්රථම වතාවට මෙම කැමරා පද්ධතිය භාවිත කිරීමට පොලිසිය පියවර ගෙන තිබුණි. පොලිසිය මෙම ක්රමය ආරක්ෂාව සඳහා ඉතා ජනප්රිය සහ සුදුසු ක්රමයක් ලෙස හැඳින්වුවද, සිවිල් සංවිධාන පවසන්නේ මෙලෙස පොදු මහජනතාව නිරන්තර සෝදිසියට ලක් කිරීම මඟින් සමාජය තුළ අනවශ්ය බියක් සහ පීඩනයක් නිර්මාණය වන බවයි.
